Sekilas Info

TALI HULALENG

BENTENG

Basudara tuang hati jantong.

Tempo-tempo lai Sander ada dudu rekeng hari.

Acim : Sander e, tar karja laeng lai cuma dudu rekeng hari su parsis Yako Bodo

Sander : beta ada lia har bae par mau batanang

Acim : (tatawa tarewas ancor) Oeeee....manusia toropepel e. Angka muka nanaku wer la nanti malang lia bulang. Orang tatua ajar laeng os biking laeng. Ini kalu tabiat parsis toropepel nih konci rekeng babingong la muka parsis tusa yang antua Minci sirang deng aer randang pulut.

Sander : ao, beta tar mau bakumalawang skarang. Jang baganggo dolo.

Acim : Sander e, beta seng baganggo. Beta cuma mau bilang tar ada orang lia tanoar deng lingkar tanggal di almanak.

Sander : suka suka beta

Acim : ose nih bukang, ajar par pintar la mangarti stengah sa.

Sander : kalu fol tumpah. Loko bae stengah

Acim : iyo, adaharos bajalang bagoyang la tar orang sorong mo rubu. Su rubu la kas salah sombar

Sander : mari la lia akang Almanak satu nih. Lia tuh. Bagus toh

Acim : bukang maeng, Sander ini nih benteng kota Laha

Sander : eh Abang nih nanaku sasabarang. Laha tuh bandara. Tau bandara ka seng, itu tampa kapal tarbang turung deng nai. Itu benteng yang di blakang kota

Acim : iyo di Bendar Ambon toh. Itu Kota Laha

Sander : Yah tuheng. Story deng tua satu nih katong musti kanyang deng tahang amarah boleh. Su tar tau apapa la tinggal bamulu iko sadap sa

Acim : Sander, di SR dolo beta su balajar akang

Sander : ini sudah. Abis makang bangko SR sa toh jadi akang nih.

Acim : mari beta tutur par se. Benteng di blakang kota tuh dolo nama kota Laha. La Bendar tuh kota. Ose kira beta nih otak stengah sang ose? Eh katong dolo dapa ajar sejarah, aljabar deng ilmu falak. Biar tulis di kalam batu mar ingatang labe dari se yang bembeng buku deng potlot.

Sander : hahaha....su malu lai. Iyo sudah mari akang almanak tuh. Beta mau lingkar tanggal. Hari bae su dekat

Acim : Sander....Sander.....hari bae tuh jang lia tanggal mar nanaku tiang benteng. Lalu lia keadaang bendar tuh babae. Lia deng mata deng hati. La iko yang Pandita Tinus bilang tuh : sumbayang angka hati biar Tete Manis kas hikmat. Ini ose parsis anana maeng benteng la majo toro majo toro cuma bisa atek sa.

Sander : hahaha.....beta atek abang mati toh

Acim : apa???? Ose balong atek lai beta su injang benteng

Sander : yooo.....biking diri

Acim : ose lia, benteng tuh beta yang biking mo.

Dong dua tatawa sama-sama.

Penulis: Elifas Maspaitella
Editor:Embong

Baca Juga

error: Content is protected !!