JANG TAKOTANG BODO-BODO

Orangtatua deng basudara tuang hati jantong!

Su brapa hari nih antua Acim jaga tinggal sein Sander sa. Apalai kalu pagi-pagi Sander su barsing la mandi baru kahai, itu seng lai, paitua Acim bisa dapa skrek tarbae paskali la mulai lur sudah tuh.

Sander: Abang e, pi do e

Sander bale badang lia muka di kaca jandela, la kas batul kancing golfi deng ujung krak kameja

Sander: Abang e….beta ka bendar do e. Jang taku, jatah gudang garang merah sabungkus tetap sa

Sander: Abang e…..ini tuli batul-batul ka kapongke su padat la tar maleleh lai nih?

Acim sondor manyau paskali. Lalu Sander pi par cek keadaan. Pas mau maso pintu bagini, Sander babatu dua kali

Acim: eh, Sander, se jang nusu par maso lai. Se badiri situ sa jua

Sander: Bapa kamponang, jadi ini beta tarewas dua ka tiga kali tuh ada lur beta dari lubang gaba-gaba nih? Jadi dengar e, mar tar manyao e. Kalu tuli tuh tuli sa abang, jang tuli barana momou lai. Kalakuang macang bagitu bukang, kalu ada rapat Saniri, jang tanding macang deng juru nasehat

Acim: Sander, se su vaksin ka apa tuh, mar mangapa se masih babatu, barsing, la kahai pagi-pagi di kamar mandi?

Sander: oh, jadi amper sapuldalapang hari abang tar mau tagor beta nih tagal akang? Abang e….korona nih katong musti jaga jarak mar jang jaga hati par sayang sudara. Jarak kas jao, mar hati bukang kas dekat sa mar kas malakat

Acim: beta mangarti, mar beta lia se pulang dapa suntik tuh, se tinggal barsing deng babatu po

Sander: dosa tar sadiki. Hidop deng beta su pulu taong; la tar tau lai kalu caca Oda su batumis tuh, la kalu cili padi su maso tacampor lengkuas, la sapa tar barsing? Tagal itu jang talalu dengar barita yang datang dari orang yang tar tau apapa

Acim: beta seng dengar barita, mar beta lia se sabang pagi bagitu

Sander: lo dari korona nih akang ada di setang pung tampa, balong par babanyarang la bajalang kuliling sini sana putus dunya nih lai beta su barsing macang itu tuh tua e….

Acim: seng, maksud beta tuh kalu su abis suntik pasti seng bagitu-bagitu lait oh

Sander: Abang e, umpama barsing tuh baju, la beta su pake akang dari dolo tuh kio. Sudah jua malawang tar maso-maso akal. Capat pi daftar di Mantri Nus ka seng Mantri Yance sana la pi suntik lai

Acim: takotang ale Sander

Sander: takotang suntik? Nanti suntik caca mau. Hahahahaha

Acim: Sander, kalu su suntik tuh berarti seng dapa korona lai toh?

Sander: dapa. Kalu bajalang-bajalang, tetap bakudapa dia sa. Kalu dudu tado dalang rumah, birman batamu, bisa bakudapa lai.

Acim: mo kalu bagitu pi suntik par apa lai?

Sander: pi suntik sana. Kalu balong suntik, bakudapa korona di jalang, dia hokmat langsung jatuh maput. Mar kalu sudah, bakudapa tuh jang kata dia hokmat, dia balumpa par tandang jua abang tar jatuh talantang la mata putih tabula bale.

Acim: se story yang batul-batul sa, biar beta mangarti

Sander: bagini. Kalu abang balong suntik vaksin, abang bisa kanal korona lalu akang biking abang napas sasa, ka bera-bera, ka panas damang goyang tar turung-turung. Lalu orang tar bisa sorong par abang tagal akang bajangke dong capat. Mar kalua bang su suntik vaksin, kanal korona mar su seng macang balong suntik, lalu akang su seng talalu kuat par bajangke. Jadi musti pi suntik vaksin sa. Macang dolo-dolo cacar lai tuh

Acim: eh, Sander, la kalu batanda mo skang beta tanda cacar jadi ampa te? Ini satu di pohong tangang, satu di pohong paha

Sander: Mo kalu ampa loko bae lai supaya ampa penjuru mata anging abang su aman, penyaki deng cilaka su tar datang lai toh

Acim: hahaha….se nih bukang. Orang tatua tanya batul-batul se bale biking par barmaeng-barmaeng

Sander: abang, suntik vaksin nih akang seng ada tanda kapa. Jadi kalu badang talanjang orang seng kira ada plastik tabakar manempel. Hahahaha

Acim: iyo e. Beta loko pi di mantri Yance par isi nama jua ale

Sander: itu lebe bagus. Mar jang lupa pake masker

Acim: eh, kalu su suntik bale pake masker lai o?

Sander: Pake te

Acim: Supaya?

Sander: Supaya sadiki orang sa yang tau kalu ada tai lalar di pinggir mulu tuh

Hahaha….Sander langsung pi tunggu oto par ka bendar!