SADAR DIRI 

Orangtatua deng basudara tuang hati jantong!

Antua Acim nih suwet maleleh sampe baju kous su babasah maleleh-maleleh!

Sander: Uiiii…..

Acim kaget, kaki tageser sadiki dari tangga, amper sadiki lai jatuh!

Sander: eh…abang. Lia tangga tuh babae

Acim hela napas dolo, la pegang di balak rumah

Acim: Nene moyang par se e. Tar bisa kas suara waktu ose masih di luar sana ka? Tadi kalu beta tita salah ana tangga bukang beta su talantang ka bawah sana tuh? Maso orang rumah tuh salam kamuka dolo, buta hati e. Jang su dalang orang kamar baru kas suara. Itu kalakuang tar manir

Sander: sio, beta minta ampong tua e. Beta cuma lia akang tangga-tangga nih, mar sapa kira kata abang ada di soldor situ

Acim: loko pohong tangga nih. Beta mau turung

Antua Acim turung la suruh Sander angka tangga pi sandar kumbali di dinding sablah langkang. Abis sandar tangga, Sander cari antua Acim, padahal laki-laki su pi di baranda

Sander: Itu tadi par apa? Ada tusa mati ka tikus bawa lari sandal ka apa?

Acim: tadi malang beta tar dapa sono tagal babunyi-babunyi di atas soldor. Tagal itu beta coba nai lur tadi tuh, mar tar dapa lia apapa tagal galap. Su sampe atas baru dapa inga kata tar bawa senter, la se bataria tuh. Untung beta tar jatuh tadi

Sander: mari beta bilang. Babunyi di soldor malam-malam tuh kalu seng tusa, mo tikus te. Kalu tar bobou, mau nai mangente par apa? Kalu bangong pagi sandal sablah tar ada di muka tampa, bukang musti nai lur di slodor lai. Lur di bawa tampa kamuka. Ini perkara di tanah cari di langit.

Acim: bukang bagitu. Beta cuma mau lia sa, kata akang maso dari mana

Sander: abang e, rumah nih sagala lobang ada. La tikus tuh jua kalu lobang tar ada, dia biking lobang sandiri. Hidop nih su ada irama, jadi tiap-tiap orang iko dia irama sa, jang bapaksa manare di orang irama, apalai kalu tar tau par manare

Acim: se su story ka mana nih?

Sander: mangarti, mar beta cuma mau kas inga, kalu tar ada bobou di soldor yo jang nai lur.

Acim: beta lia sa, nyong, sapa tau ada la angka tempo sebelum honar nai la tar sono to

Sander: Tubuh su tua, kaki su tar kuat tita di ana tangga, mata su tar tarang lai baru lupa bawa senter. Jadi sadar diri tuh kata su tua, la kalu mau biking apapa yang katong tubuh su tar mampu lai, panggel Syaiful ka Yohanis sablah la suruh dong saja, la abang tugas loko pohong tiang sa supaya jang dong jatuh toh

Acim: iyo lai. Mar Syaiful deng Yohanis jua tar di rumah

Sander: mi tunggu sampe dong datang toh

Acim: iyo sudah.

Sander: mar, macang beta tar ciong bobou kopi ka?

Acim: Ampong dosa. Sander. Se toro 2 meter. Se korona. Skarang gejala korona nih bukang, se tar ciong bobou deng tar rasa makanang pung rasa lai. Toro Sander. Toro. 

Sander: hahahaa……takotang sampe sakakar kopi sabeker.

Acim: nene moyang nih. Biking beta takotang baru sa. Eh kalu mau kopi pi bilang se pung Caca Oda sana.

Sander: mar ada talam sagu ka seng??

Acim: nai soldor la lur, jang same tusa deng tikus tadi malang su makang patita deng akang