Sekilas Info

TALI HULALENG

JANG PARSIR

Orangtatua deng basudara tuang hati jantong! Ana Sander nih macang tar ubah kalakuang, padahal umur su mulai nai badang.

Acim: Sander e, se nih bukang, taong ganti taong mar tar pernah ubah kalakuang

Sander: Abang nih mulu parsis parampuang busu. Banting kata tuh rasa-rasa orang pung hati lai, kira kata di dalang nih gaba-gaba kapa? Iris jua merah abang, jadi bisa tersinggung lai

Acim: se nih jang kata tersinggung, hati badugal jua beta ada meku apa? Sa senti pun beta tar meku deng os

Sander: ini su tambaru abang e

Acim: Tagal tambaru, tagal itu beta bilang se tar ubah kalakuang busok tuh

Sander: barang beta ada biking hal apa la? Abang nih, ayang tar kukutek pi lur rorok, parsis talor tar ada la maki ayang punggul tar abis

Acim: jang se bale haluan

Sander: bale haluan bagumana deng anging sa tar ada yang nai. Abang tuh yang ator kamudi salah, la konci rekeng najung patah, la kas salah beta

Acim: skarang beta tanya se. Ada Korona ka apa barang bardosa nih sapa suruh se biking sabuah la kas turung kalamkas, la manyanyi tarewas sampe pagi buta? Coba se manyao beta. Se kira kata se suara bagus langgar Brury Pesulima ka Zeth Lekatompessy? Ose kira kata su tado-tado nih la se su bisa kumpul anana par biking katredji? Ose nih kalakuag macang apa e? Ose seng lia kata orang masih takotang pi rumah saki par barobat tuh? Ose tar rekeng orang yang masih takana tuh? Coba ose bilang kata di negri nih katong su aman?

Sander: Abang e, biasa tambaru tuh ada pesta anana muda toh, la beta nih cuma biking hal yang dolo abang dong biking lait uh

Acim: se bilang apa? Se mau parsir par apa? Jang taru masoso

Sander: seng o, abang. Masoso apa talalu-talalu lai o

Acim: he, pake handeke sadiki. Kalu tar korona, ose mau biking kartedji tiga hari tiga malang jua beta tar meku. Pemerintah ada upaya, pimpinan umat beragama ada tarewas, mar se nih macang su somba illah laeng la tar mau dengar dong paskali. Stop deng kamorang pung pesta bodoh tuh

Sander: iyo, kalu bagitu bicara babae sa toh, la beta pi kas tau dong jujaro mungare tuh babae lai, jang bakalai macang bagitu

Acim: bakalai sa, tagal ose iko aros yang salah. Macang se nih kalu bicara babae, se tar brekeng. Jadi musti suara basar sa

Sander: mar ini abang bukang suara basar sa, mata manyala lai….hahahhaa…..biking takotang sa

Acim: jang se umping par kas lombo beta hati. Pi manyimpang se pung kalamkas tuh kas maso jang beta loko rep ampa kan la beta kas ancor akang

Sander: oh berarti abang yang tar ubah kalakuang

Acim: se bilang apa?

Sander: Sapa yang seng kanal Acim zaman bakupukul antar kampong dolo-dolo. Abang kan pung gelar Acim Ampa Kan toh? Hahahahaa……su tua, su tambaru, ubah kalakuang tuh…..hahahahaa

Acim: se jang labe

Sander: uiii…..tangang su karepo, bembeng rep ampa kan skarang jua su tar mampu kong mau pukul beta deng akang? Balong par angka lai su jatuh po balaga

Acim: se tunggu beta e

Antua Acim langsung pi ka jiko rumah cari rep ampa kan. Hahaha….Sander langsung lari ka sabua yang dong ada mau karja la suruh stop karja, jang Acim mangamu. Hahahaha……(*)

Penulis: Elifas Maspaitella
Editor:Embong

Baca Juga

error: Content is protected !!