JANG BABANTING

Orangtatua deng basudara tuang hati jantong!

Sander nih bukang, parsis layar jungku musing timor. Dapa lia ujung sa, mar skali jungku turung, lama e baru timbol kumbali. Su bagitu, pas sampe dara, babanting parsis sudagar Jawa, padahal garang sabuku jua tar ada di panta tas.

Acim: Sander e, Corona ka apa satu nih akang jadi makanang, beta talang sondor mama lai. Mar ose nih, su lebe dari sipat torat lai

Sander: tar ujung tar pohong bamarah tarus. Ingatang, umur su makang badang, jang kiri-kiri la tensi nai, oksigen stop lari ka otak la he’e

Acim: oe botol manci poro bico e, orang macang se yang bakurung diri tar kaluar par nganga matahari tuh yang he’e tempo, la abis dalang muka layo macang bagitu. Oe, papaya masa panas jua lebe bae dari os dalang muka. Se su parsis nangkla blanda busu yang tikus nisi

Sander: Corona nih bahaya abang o, jadi musti jaga diri.

Acim: jaga diri te mi. Mar bukang sang se la bakurung sa amper dalapang bulang tare-tare 

Sander: badang sa yang bakurung, mar pendengarang tetap bagus par iko perkembangan toh

Acim: se tuh bukang iko, mar lur perkembangan. Lur. Lur dari lubang dinding gaba-gaba tuh. Tagal itu la su tar tau kata dinding tuh su musti ganti, apalai su mau Kajadiang nih

 Sander: iyo ale abang, beta baru dapa sadar lai kata su amper Kajadiang

Acim: beta lia se nih, sabang taong, beta yang kas inga se par Kajadiang. Mar tar herang mo, tagal teras gareja sa se inja akang par duapulampa malam sa

Sander: sudah jua, jang par tarkira orang pung hal. Abang e, mar ada atap barang dua lirang ka seng e. Beta mau panirit kamar dolo. Desember nih macang pancaroba tar bajalang babae, la maso Kajadiang nih ujang torana tar brenti nih

Acim: Sander, corona nih jua jang talalu pastiu deng rumah tuh lai

Sander: Tuangampong, rumah apa, atap dua lirang par panirit di kamar sa. La kalu ujang lai mo skang hener beta dalang kamar, la kira-kira beta mati dinging di Kajadiang lai o abang?

Acim: Oh se maksud atap?

Sander: dua lirang sa

Acim: jang se marah, beta kira se mau ganti dinding

Sander: talingang tuh ada lubang lai ka seng?

Acim: iyo jang se marah, tagal beta lia macang orang banya jua seng maniso par biking bae rumah. Iyo, mari katong jaga yang ada saja jua kalu masih bae, biar kalu ada labe, bisa pake par tulung orang susah banya nih tuang

Sander: beta ambel di blakang e

Acim: ambel apa?

Sander: atap dua lirang tuh abang eee

Acim: yah ampong, nyong e, se talat

 Sander: talat apa lai?

Acim: tadi beta baru kasih par Nyong Beng panirit dia pung baranda, tagal kalmaring ayang dua ekor baku pukul di atas akang baranda tuh. Ayang-ayang nih macang su tar kintal par bakpukul lai

Sander: eh tua, kalu tar pung apapa tuh jang babanting tar guna.

Acim tatawa sa. Dalang hati, se pung muka pamalas tuh, se rasa! Karja cuma par tidor, bakurung dalang rumah la tar tau apapa satu dalang negri lai nih, se rasa. hahahahaha