Sekilas Info

TALI HULALENG

TAR MANIR

Orangtatua deng basudara tuang hati jantong!

Ini antua Acim ada pameri sanapas di dusung, mar bakanor tar brenti paskali. Pas Sander lai ada pi ka dusung par mau potong rabong.

Sander: Abang e, orangtatua bilang, kalu pameri tuh tado sa, tagal kalu bakanor, rumpu putus par oras nih mar ana rump nai iko, la konci rekeng pameri sampe buah tangang palahatu lai mar tar kuat par barsih

Acim: Jang se bamulu sasabarang kalu tar tau apapa

Sander: beta kas inga sa. Hahahahaha….kiri-kiri nai tempo e

Acim: Alexander, jang se labe

Sander: hahahhaa…..awas jang darah nai la kira pala ana di muka tuh par sanusu la farmak akang putus lai…..pameri jua tuang, beta mau pi lia rabong mata susu barang dua jua

Sander pi ka mata bulu di tanitar yang pas di graf sablah duriang masa karing par cari rabong, sedangkan antua Acim su bale ka walang par kas brenti swet la mau buka bakal. Tar brapa lama, Sander su bale bembeng rabong sa ika kacil.

Acim: Karnikus e, jang ambel yang masih mata susu

Sander: sondor. Beta jua tau kalu itu musti piara

Acim: se ada kanal rajing apa la nai ka utang nih?

Sander: maitua mau biking rabong karing, biar simpang toh, deng ujang su mulai taru nih, la keadaan ada susah lai nih

Acim: yang bilang keadaan susah tuh katong sa Sander e. Dong yang ada pung berkat sasadiki tuh dong seng rasa akang susah ka’apa

Sander: sapa bilang abang, ini masa samua orang susah, ada yang helahai tar brenti pas garang ka baras abis

Acim: hahaha…..macang se la baras abis trus bamulu bini tar brenti, barang su tar tau tundu isap papeda toh. Sagu ada badiri sama deng sanusu di blakang rumah tuh mar tar meku akang par sadiki lai. Se nih bukang, kalu dunya susah, se mati kamuka

Sander: Abang, kalu dolo dong bilang biar miskin tapi tau snang sa, mar skarang nih biar ada corona, katong sanang-sanang sa. Seng usah dudu pikir akang, floit sa biar hati sanang

Acim: orang banya ada susah tar dapa karja deng bae jadi jang se pikir diri sandiri

Sander: sapa pung hahalang dia pikol sandiri toh abang

Acim: itu kalakuang tar manir labe dari kompeni

Sander: dunya nih bagitu jua abang e, kalu memang kaki tar bisa inja pesta, nonton sa toh

Acim: oh beta tanya se, kalu ada makburet, se pesta la cakaiba kas nai abu?

Sander: kalu oras pas, mo pesta te abang

Acim: se pung jalang pikir nih unju kalu samu jua lebe pande dari se

Sander: barang?

Acim: Samu tuh, pas oras kumpul makanang, dong pikol sama-sama bawa ka dalang sarang. Su batul samua baru dong makang rame-rame. Mar ose nih, tar bisa par tanggong sudara pung susah tagal pas lia makanang di atas meja deng loko piring deng sondo la warmus iko suka tar pikir orang blakang. La kalu orang tagor par kas inga kalakuang tar manir tuh, lari sambunyi kalu seng lai badiri unju jago deng kuat par orang sudara. Sander, dunya nih katong samua ada susah jadi jang se iko tabiat tar bae macang bagitu

Sander: hahahaha…..abang nih macang tar tau basangaja sa

Acim: frek deng os. Beker sana tuh

Sander langsung loko beker la saleng kopi trus dong dua dudu kewel di walang

Baca Juga

error: Content is protected !!