Sekilas Info

KEWEL TIPIS TIPIS

Bukang Anggaran Pendapatan deng Blanja Dapor (APBD)

ilustrasi

Antua Caci pica kapala par poka-poka tagal antua pung ana Johan kelder mengente di langkang dapor kong bilang,….

Kelder: Mama ee, bage sakepeng par beta hotu sadiki ka bendar dolo.

Deng segra Caci manyau: Kelder, seng ujang tar panas os datang palak beta par pi di bendar. Kakarlak mangkali su ei ose pung otak. Koliling tampa orang ada taku baronda tagal Corona pung tonel, ini ose mau basena ka bendar.

Kelder: Mama jang segra gas bagitu, beta hotu kasana tagal katong pung kahidopang kio.

Caci: Kahidopang potar apa, tuang dosi ee? Kahidopang tuh dudu tado di ruma la lunjur tangang par basudara dong yang ada baku dekeng par tada Corona nih.

Kelder: hayuuu, kas mangarti mama nih tar gampang ale. Beta hotu pi par katong pung APBD kio mama.

Caci: Ose parsis antua Pece (Kelder pung alm tata), sasaja buju beta deng cigulu-cigulu.

Kelder: Aer hener seng ka atas kio mama, tagal tata pung cigulu-cigulu sampe mama taguling-guling tuh kio, ahaeeeeeee

Caci: Ose sang percok! Lalu os pung maksud apa deng cigulu-cigulu APBD tuh?

Kelder: Ini bukang cigulu-cigulu mama. APBD tuh Anggaran Pendapatan Balanja Dapor. Katong di negri bilang ator kepeng masu kaluar dalang dapor. Itu yang mama ada biking sagala hari deng tanding kukis kolombeng di poris muka ruma tuh kio. Rekeng kepeng masu kaluar, kong mama tinggal bakanor rugi jalang muka.

Caci takajo, lalu deng muka tabadiri manyau: Dalang sorga! Kelder ee, mama mau untung bagmana kalo kolombeng kaluar dar oven lai stenga baki su abis? Balong lai kalo su tanding di poris la os basena kasana kamari, kolombeng linyap satu abis satu.

Kelder: Tuandalar! mama buang perkara par beta lai, padahal ini tagal mama ator sala. Pengamanan oven deng poris tar batul jua mo. Tagal itu bet mau hotu ka bendar par lia dong pung model pengamanan oven deng poris.

Caci cigi badang nai dar muka tungku, kong ola Kelder deng aru-aru papeda: Panta Balanga ee (Kelder itam macang panta Balanga), kalo tangang su biasa tou kolombeng dar oven deng poris, jang os kasala bet pung pengamanan. Kepeng dalang mama pung tali kaeng jua ose ada bore akang mo, apalai kolombeng di poris deng dalam oven.

Kelder: Hayoo ee, mama nih jadi deng sarong kapa, kong bisa tudu beta tou kolombeng sondor lia. Ingatang mama, dosa sangka tuh lebe basar dar dosa tou. Tou tuh tagal perlu, maar sangka tuh tar ada alasan.

Caci: Ana ucing ee, waktu beta barana, ose pung lida ada lurus, maar skarang sapa su platen os pung lida macang bagini nih? Untung bae ose seng jadi anggota dewan, tarada bagini ose su kabualang masyarakat satu negri. Par mama sandiri saja ose putar bale.

Kelder mulai maraju: Mama Cici sayang ee, samua orang su tau kalo mama pung hati macang kukis pisang abu-abu masa pohong, goreng mangkal-mangkal. Masakan par mama pung jantong hati nih mama sampe hati kas kaluar kata bagitu lai? Bet minta hotu ka bendar bukang par loleng, tapi par ator katong pung hidop kio mama ee.

Cici: Sioh ana tuang jantong hati pisang abu-abu masa karbit ee. Tempo apa os bicara ator kahidopang? Ose sandiri su lia macang gabgaba bangka, panta poro basar mar tinggal tampa. Seng arika sadiki par bangong kahidopang. Badang basar, gamu aer, mar otak sacupeng. Ose nih ana ee, balong tulis lai mama su baca. Os pung APBD tuh nanti par jadi umpang Corona.

Kelder: Ingatang mama, jang sumpa anana! Bagmana kong bet pung maksud bae deng APBD mau jadi umpang Corona lai?

Caci: Hoeee karnikus alus ee! kalo langka cuma sajingkal jang balumpa di mama pung depa. Os pung APBD tuh bukang ‘Anggaran Pendapatan Deng Blanja Dapor’, mar ‘Alasan Par Baronda Dolo’. (*)

Dikutip dari catatan Om Katete (Kewel Tipis Tipis)

Baca Juga

error: Content is protected !!