Sekilas Info

TALI HULALENG

DEPA CAPAT E

Orangtatua deng basudara tuang hati jantong!

Sander baru pulang dari bendar ale. Mar muka lia layo paskali, padahal kalmaring-kalmaring su tar manahang tagal dapa pele kiri kanang, mar ini pas jalang-jalang tabuka, pulang deng muka layo. Tar lama Acim sandar:

Acim: Karnikus e, jang biking diri macang kera la kira beta tuturuga par se tipu tapa deng se pung muka layo tuh

Sander: Abang jang biking beta dame hati ilang

Acim: hahaha…..pasti se pi mar toko cina balong buka toh? Tar dapa ambel tabaku toh? Itu la os rasa

Sander: Abang e, keadaan nih toh, loko kalu tar ada parlu, dudu tado dalang rumah saja labe bae. Beta lia dong slak-slak nih macang ada maeng enggo basambunyi sa nih

Acim: se su dapa anging tarbae di ujung kuburan sana kapa?

Sander: ao ini beta istori batul nih

Acim: barang????

Sander: dong pele jalang-jalang kalmaring, eh pas jalang-jalang tabuka, dong langsung badepa ka orang pung gunung tanah tuh

Acim: su tar manahang tuh Sander e. Se kira kata se sa yang su pastiu takurung? Dong lebe lai. Jadi ini yang biking se muka layo? Karnikus bodoh nih. Beta su kira ada ap alai

Sander: Ao bukang bagitu. Beta cuma tar abis pikir sa

Acim: oe, se otak tar sampe par pikir dong pung sagala hal. Kalu umpama tampayang aer minong, se otak nih toh aer tinggal di panta tampayang sa, jadi jang bapaksa par pikir orang-orang basar pung hal. Tagal itu kalu pikirang cuma sajingkal, jang balaga deng depa tagal se depa lai, dong su sambilang depa di muka. Jadi se di blakang tarus te

Sander: iyo mar dong badepa ka sana par biking apa?

Acim: barang beta ada dapa untung kalu manyao se pung tanya? Pastiu. Maso rumah sana mar cuci se pung tangang dolo, kalu parlu lai pi di antua Solemang pancorang tada kapala biar se otak tuh akang ba isi sadiki, supaya jang kasih diri par dapa tipu la pulang negri bale tipu tapa basudara di sini. Se pi sana. Se kira kata jalang-jalang su tabuka nih la akang virus su pi ronda iko dong ka orang gunung tanah?

Sander cuma bisa nganga Acim sa. Hahhahaha…..tar bisa labe lai tagal dalang muka masih tinggal layo….

Baca Juga

error: Content is protected !!