Sekilas Info

TALI HULALENG

NAMA BARAT

Ongtatua deng basudara tuang hati jantong!

Corona nih biking Acim teras ba’ombong tagal manusia dua yang biasa dudu manggarang tuh tar brane dudu baku muka. Mar par ujang-ujang nih, antua Acim pi par Sander. Laki-laki su potong daong pisang la bapamong tuh.

Acim : Sander e. Sander. Buka pintu nih lakas o. Beta su basah nih. Alexander eeeee

Sander: Maniso apa par ujang bakat alam nih o. Lakas maso

Acim pas slak mau dudu

Sander: eh….pi cuci tangang dolo. Tuangisa e….jang par biking parkara

Acim: Sander, se kira beta su kanal puskeke bodoh tuh lai? Se lia, ini bukang cuma kaki karsang yang babasah, mar tabaku di atas nih lai su basah nih. Se mau beta mati dinging par amper malang nih??? Manusia tar pung hati nih e

Sander: Antisipasi

Acim: brenti deng se pung istilah nau-nau tuh. Antisipasi se pung nene moyang apa

Sander: kalu su tar tertib dalang hal kacil nih mo skang tar bisa iko atorang basar te

Acim tar pastiu deng Sander paskali

Acim: Ola e, kopi di beker biasa sa e. Mar jang campor e, wer nih musti yang panas malapo boleh. Lalu Ola e, klapertart yang pagi tuh masih ada sisa toh???

Ola tatawa sa di dapor, la loko beker biking kopi par antua Acim deng dia laki, Sander

Acim: Danke lai ana mantu e. Se nih kalu dapa laki bae-bae satu toh, se su di udara kapa

Ola deng Sander tatawa sa. Antua Acim nih parkara cari gara-gara tar ada lawan.

Acim: Sander e, itu mangapa kalmaring dong baku lari tuh

Sander: Korneli kapal su bongkar muatan

Acim: Korneli sapa?

Sander: Antua Korneles pung ana parampuang tuh. Petrus rahang pung bini

Acim: oh iyo ka. Lalu dong bakulari tagal apa?

Sander: ana pas jadi la manangis tahang napas panjang sampe amper biru

Acim: apa soal?

Sander: Tuang tau. Dong bilang pas paitua Korneles kas nama deng jadi lai

Acim: barang kasih nama sapa?

Sander: iko dia nene te

Acim: Korlina?

Sander: akang tuh

Acim: lalu??

Sander: mi ganti te

Acim: ganti deng sapa?

Sander: tuang tau. Beta cuma dengar dia tete tatawa tagal ana tar tarima nene pung nama, kata iyo loko jang deng nama tuh lai skang se mulu sang kacang goreng iko nene

Acim: la ganti

Sander: te mi, tar ganti la ana biru

Acim: itu kamong samua pung salah

Sander: salah apa? Di dunya nih abang sa yang batul. Samua orang dalang negri nih salah

Acim: Bukang bagitu Sander. Waktu Yohanis jadi, se kasih dia pikol dia tete nama dia seng bagitu toh?

Sander: seng te. La nama laki-laki bae tuh

Acim: se salah.

Sander: kumbali

Acim: ini beta kasih inga se

Sander: kas inga par apa lai, katong su seng tambah ana lai

Acim: bukang par se, mar supaya se bilang par yang laeng-lang lai. Kalu bini su deng badang la su amper waktu par ana jadi, se musti kalesang dalang rumah, kamar, dapor. Se musti taru kayo bakar skali tagal saban hari musti aer panas di tungku. Makanang karing lai se su musti taru banya-banya tagal bini tar boleh lapar. Kalapa tuh yang paling utama, tagal katok ka ganemo ka, samua musti santang par aer susu. Su bagitu, se tar boleh mengeluh lalah tagal ikang tetap musti par kuah aer garang, mar jang se pake cili. Su bagitu se musti taru sabong skali par cuci baju-baju kotor, lalu lia blek minya tanah, tar boleh kosong, tagal kalu se bunuh lampu basar, musti bakar palita di kamar. Samua itu se musti taru skali. Kalu sudah, pas jadi, baru se kasih nama dia.

Sander: tambong itu jua o

Acim: se kira rumahtangga nih rumah kacil? Rumah kacil sa kalu Yohanes dong maeng, dong pura-pura mamasa sayor, nasi, tuang papeda, masa ikang toh?

Sander: iya

Acim: Sadar??? Beta mau bale!

Penulis: Elifas Maspaitella
Editor:Embong

Baca Juga

error: Content is protected !!