KAWE-KAWE

Orangtatua deng basudara tuang hati jantong!

Sander ada dudu baca berita onlain.

Acim: Sander e, kalu su seng bisa keker leter-leter tuh lai jang paksa nyong. Beta kacamata molo ada labe dua, ambel satu sa

Sander cuma angka jare mai tangang kiri sa mar tar angka muka lai.

Acim: se biking apa tuh?

Sander: Baca koran

Acim: hahahaha…..ada manusia bodoh di negri nih, antua Raja tar loko user dia sa

Sander: Baca supaya jang stori kosong la bamarah bodoh-bodoh

Acim: se ada biking apa tuh?

Sander angka muka par antua Acim

Sander: Baca koran te. Lia nih (angka hape la unju par antua Acim). Ini e, koran. Koran. Koran. Tau ka seng. Koran.

Acim: su bodoh baru masoso

Sander: masoso apa? La ini koran ka bukang

Acim: itu hape. Yang se baca tuh barita di koran onlain. Koran tuh macang bagini (unju kartas koran pagi). Bodoh!

Sander tar dapa slak lai par balas. Dia dalang hati, ini barang satu nih akang biking parkara skang imun tubuh turung! hahahaa

Acim: Sander e, se tuh kan jadi Ketua Jujaro Mungare toh?

Sander: dolo o. Skarang su calakate nih, mungare apa lai

Acim: iyo lai. Lupa

Sander: barang mangapa lai kong su bicara Jujaro Mungare nih?

Acim: beta maksud toh, dong yang jadi ketua-ketua ka bos-bos dong nih tar bisa jumawa sadiki par kas dudu atorang la kalu sapa langgar, loko skot mi! Kakarasang sadiki kalu itu par samua pung bae toh? Ini cuma bisa uru dada, la tempo-tempo manangis. Caciwe apa talalu lai o? Kabaresi sadiki ka, kalu mau par bae. Masyarakat nih bukang, kalu se cuma bilang-bilang sa, la se seng gartak hela cawani sadiki, dong tar brekeng. La konci rekeng, se bale iko dong aros lai

Sander: beta tar tangkap abang maksud

Acim: lalu jang cuma dudu par lur kata su brapa maso, brapa kaluar, su tambah brapa, kurang brapa. Loko suru kapala-kapala soa deng samua jou badiri di ampa penjuru mata anging la pele jalang-jalang nih.

Sander: ini abang su bawa beta maso sapa labuang nih?

Acim: Ose lai, jang kawe-kawe talalu

Sander: ancor klep. Beta ada babingong denga bang pung tuturan baru bilang beta kawe-kawe. Ini dunya su jadi apa nih?

Acim: pastiu deng kamong

Sander: dosa jua. Abang e, beta sandiri sa nih. Abang su lia sapa sumangan di blakang beta nih lai? Jang masoso o

Acim: masoso-masoso apa. Sorang tuh yang masoso. Coba biking atorang babae sadiki la jang tipu-tapa masaraya nih

Sander: Abang e. Abang!

Acim bale blakang maso ka dalang rumah. Sander bingong la pi loko antua Acim koran par cari tau musabab laki-laki marah. Pas baca brita bagini, Sander goyang-goyang kapala.

Sander: (bicara par diri sandiri sa) Sio, antua Acim nih balisah deng akang brita nih paskali e.

Acim: (bataria dari dalang rumah) taru koran tuh situ la brangkat!

Sander: abang e, kalu kapala saki jang brobat di kaki

Acim: brangkat!

Sander: kalu kaki saki, jang uru isi ha’i

Acim: pastiu deng kamong

Sander: Abang yang kawe-kawe mo

Acim: se bilang apa? (Antua Acim slak mau kaluar deng Sander cucu duablas langkah lai. Hahahah)