Sekilas Info

TALI HULALENG

TAR PALASI LA DAPA SAKI

Orangtatua deng basudara tuang hati jantong!

Antua Acim nih su sama deng jou par Sander sa. Laki-laki pung bangkawang tuh ada sisi di dinding gaba-gaba.

Sander: Abang e, loko pi buang akang bangkawang tuh. Biking beta macang deng mungare-mungare yang ada pawaru orang pung tatanamang sa

Acim: Ini bukang par ose sa. Ini par sapa sa yang masih mau maniso la bastel kaboi dalang keadaang yang su galap gulita nih

Sander: Ada stel radio tadi ka seng

Acim: se talingang tuh musti pula-pula deng besi merah manyala. Tar dengar akang babuni nih?

Sander: tuang ampong. Itu suara dari radio? Beta su kira riang-riang dalang rumpu-rumpu tuh

Acim: wer tar bae, jadi siaran maso tar bae lai

Sander: la su brapa?

Acim: saratus tujuh

Sander: apa tea bang? Nai capat itu jua o

Acim: ada ujang, cacing su pesta dalang tanah jadi subur, tatanamang tumbuh bagus. Tagal itu dudu tado situ sa. Se bakabas par bajalang ka sana ka mari, itu berarti se deng beta sudah

Sander: yuuuu……su tua. Beta kore sa deng buf lai. Hahahaha…….

Acim: macang se tuh, beta tar perlu tarek palungku. Manusia yang tar palasi deng keadaan macang se tuh bukang, rep lima tujuh sa

Sander: Hahaaha….bae kata kuat angka akang lai? Hahahahha

Acim: Hahahaha……itu kumbali. Mar Sander e, apa kong akang su nai capat nih. Macang pancar gas sa. Lia akang tarbang di sini, padahal ekor su panjang di blakang ale

Sander: itu tagal yang abang bilang tuh. Orang-orang tar palasi deng keadaang paskali. Sabang hari tanya, su brapa? Su brapa? Ini macang katong ada jumur cengkeh la rekeng su brapa karong sa nih

Acim: di bendar dong masih bajalang kiri kanang lai o?

Sander: Tuang tau akang. Su amper ampa puluh dalapang hari beta manggarang dalang rumah sa nih

Acim: Iyo ale. Loko pasang matakao sa di jalang-jalang di bendar sana tuh, supaya jang ada yang maniso talalu

Sander: Abang kira ini dolo-dolo kapa. Oras nih bukang, Abang taru matakao dong su tau itu gartak sa la dong langgar te

Acim: Sander, dolo tuh, kalu antua Raja su suruh marinyo bataria titah supaya samua orang dudu tado dalang rumah kalu ada muntaber, samua orang dudu tado dalang rumah. Mar oras nih bukang, larang sama deng suruh

Sander: iyo dong tar palasi par lia keadaang nih. Sabang hari tanya su brapa, dengar radio angka su nai, stel tivi lai tukang baca brita tuh bilang di sini angka nai, di sana angka nai, la kira itu biking dong takotang kaluar rumah? Sondor e.

Acim: la skang musti bagumana?

Sander: bagumana apa? Tetap musti tado dalang rumah te. Mau pi mana lai? Pi jua mau biking apa deng sapa di mana? Samua tampa tutu. Maniso dudu lama-lama di satu tampa la orang kira orang gila.

Acim: se tau bukang, kalu samua tar palasi, skang dapa saki

Sander: sudah tuh

Acim: iyo tagal itu musti dengar-dengarang

Sander: bataria akang di radio situ jua

Acim: nene moyang nih!

Jadi, orangtatua deng basudara e, angka-angka nai macang pancar gas sa nih. Mari dudu tado dalang rumah la dengar-dengarang jua!

Penulis: Elifas Maspaitella
Editor:Embong

Baca Juga

error: Content is protected !!