Sekilas Info

TALI HULALENG

TAGOR SAMA DENG SURUH

Orangtatua deng basudara tuang hati jantong!

Antua Acim nih ada hati lalah deng keadaang par oras nih. Su bagitu, antua tambah jumawa pas lia Sander su stan deng calana jengki deng baju kous leher buntal deng capae, baru capatu yang patut mi. Acim poti-poti loko bangkawang yang ada sandar di dinding

Acim: Sander, se su stan kaboi nih, mau pi mana? He se mau pi mana (deng suara tinggi paske)

Sander: Ih, sampe bembeng bangkawang panjang itu jua o? Abang, beta nih bukang Zaiful deng Yohanis dong yang masih barmaeng mutel kolang satu la mau gartak deng bangkawang

Seng pastiu denga papa satu lai, Acim skot Sander jua mo. Sander lari maso dalang rumah baru tatawa par pagi-pagi

Sander: Tuheng, beta su biking dosa apa sampe abang puasa su batal nih lai. Abang e, beta minta ampong jua. Beta seng niat bagitu abang e

Acim: Se nih mau apa yang batul? Corona ka pustema tuh mulai-mulai ose parsis tukang ceramah dalang negri. Ajar orang cuci tangang, jang pegang tangang, jang ini deng itu, la oras nih ose su sama deng spok. Se mau pi mana?

Sander: Abang e, oras nih bukang, kalu mau kaluar rumah ka pi ka bendar, pi sa, yang penting pake masker tutu mulu deng idong. Akang barang Corona tuh tar bisa maso

Acim: Oe, karnikus. Matakao yang orang su tau tar boleh maso sa ada yang langgar, kong ini lai. Se tau e, rayat nih bukang dari dolo tar biasa deng pake masker prop idong deng mulu

Sander: mo musti kas’ bias ate

Acim: tutu se prop. Beta balong abis bicara

Sander: mo bicara jua. Beta su tutu prop nih (tutu mulu deng tangang dua-dua)

Acim: Jang se maniso baheu ka sana ka mari, ka konci rekeng tagal se katong satu negri nih dapa sial. Jang se maniso la bale deng barang tarbae tuh ka mari. Se tinggal dalang rumah sana. Bakurung situ, mau muka kuning ka pucat baraer ka, dudu tado ka sana. Sorang nih bukang, parsis ada orang cabar kata keadaang nih tar apapa, la mau coba-coba. Se kira itu bagus. Se kira akang sakitang nih jua coba-coba. Kalu mau kas putus akang pung mata rente ka apa satu tuh, loko dudu dalang rumah sana

Sander: mar abang e…

Acim: tutu prop. Dengar sini. Se tau, dong di rumah saki tuh jua su kas tinggal dong bini ana lama. Tado dalang rumah situ, supaya dong bisa bale capat ka rumah lai. Su bagitu, pemerintah jua su tar bisa biking apapa satu par masaraya nih pung panghidopang. Jadi tado dalang rumah ka sana. Imam deng Pandeta-pandeta dong jua su bicara ulang bale mar kalu tabiat macang se nih bukang, eh mangkali Tuhan turung baru se sadar.

Sander: tagal itu abang iko brita lai bole

Acim: jang se biking tingkah talalu. Dengar! Se seng lia di brita tuh? Oe muka itang e, bagitu ose positif, muhabet jua tar bisa urus. Se pas pi deng vaya kondios mai darling lai. Se bilang brita toh, ha se su lia di brita-brita toh? Jadi dudu tado situ. Se mau pi bakumpul rame-rame par apa? Mau bakudapa sapa talalu yang penting daripada dudu deng bini ana? Se mau biking apa? Kantor-kantor samua tutu, se pung tamang-tamang politik ka apa tuh jua tar ada yang kluar rumah, la se mau pi maniso batamu dong rumah? Awas jang se kaki pas inja muka pintu lai dapa plakat “Dilarang bertamu”, la pulang deng panta panas. Jadi dudu manggarang dalang rumah sana.

Sander: Mar abang e

Acim: Apa? Se baras su tar sebiji lai? Beta sagumantah ada 7 tumang. Se kopi su abis? Aer putih panas deng sagu lempeng sa poro su tare. Se roko abis? Isap tapinawang sa sampe se po’a sandiri. Beta daong tabaku iris ada fol dalang toples. Se apa abis? Garang? Ambel di beta dapor. Apa lai? Tagal itu, dari keadaang masih bae-bae, jang maniso ka bendar, pas jamang susah baru skrek la inga dusung. Orang pagi-pagi manggurebe jang ombong jatuh, mar se manggurebe unju se pung tombong tuh.

Sander su tar bisa bicara apapa lai. Dia bale pikir, antua Acim nih batul lai. Su bagitu, sio antua ada puasa la tagal beta pung kaki pardidu nih, antua puasa batal lai.

Sander: Abang e, beta nih sabang hari su biking salah par abang, mar beta rasa macang hari ini nih beta pung salah paleng basar paskali abang e. Sio abang ada puasa lai baru beta biking abang marah-marah lai

Acim: Beta tar marah. Beta tagor se. Se tau mangapa?

Sander pas mau jawab,

Acim: Jang se manyao beta. Se parsis anana alus-alus yang tar tau hati, la tagor sama deng suruh

Antua Acim langsung bale taru bangkawang la cuci tangang di tampayang yang antua su taru di muka baranda par orang cuci tangang kalu abis biking apapa par oras nih. Sander tinggal manyasal su biking salah, la mulai baganti ulang deng baju rumah.

Sander: (nganga antua Acim la bicara dalang hati sa) Iyo ale, beta musti turut antua Acim pung ajarang lai. Dudu tado jua. Orang saki su tambah banya nih, jang biking par tambah lai.

Jadi mari iko ajarang jua, jang tagor sama deng suruh lai, orangtatua deng basudara e.

Penulis: Elifas Maspaitella
Editor:Embong

Baca Juga

error: Content is protected !!