Sekilas Info

TALI HULALENG

TAPAREGO TOH?

Orangtatua deng basudara tuang hati jantong! 

Sander nih su babingong sampe taputar di blakang dapor, kaluar maso parsis omba maso kaluar di tubir-tubir tanjong.

Acim: Oe, bungang-bungang su tua, jadi jang tada ujang ampas. Oras nih bukang ose barsing orang su tar bilang “umur panjang” lai, mar dong rabe mata la lari dari ose. Maso ka sana, jang biking diri jago

Sander: Beta mau lari pi lia pisang sarambu tuh dolo. Tadi Nona Pelu ada kas tau kata burung su tetu sika yang tua. Bae jua, baras su abis di blek tuh abang e

Acim: hahaha……se tanang apa hari kong akang su babua?

Sander: mau tanang ka sondor ka, kalu tar langgar sipat tetap beta pung toh. Jalang-jalang su tatutu samua, jadi su tar bisa pi pasar

Acim: o pasar tutu baru bale muka lia tanitar di dusung spanggal tuh e

Sander: iyo jua. Musti bale makang pisang rabus deng kalapa sisi sa kalu seng la skang mau hap apa?

Acim: hap anging sa

Sander: Sudah jua, pi maso ka sana. Maniso la manyampor tar kira-kira paskali

Acim: hahahaha…..ini tagal hidop tar mau ingatang orang tatua ajarang la konci rekeng babengkeng salah-salah wer, ose nih

Sander: apa talalu kong bahati tar barenti nih

Acim: bahati se par apa?

Sander: Mo maso ka sana. Dunya su susah, eso-eso nih jang kata baras sakilo, ikang jua mangkali su tar ada di pasar

Acim: la sapa susah?

Sander: samua te. Abang kira kalu pasar tutu la orang pasar sa yang susah? Satu dunya bisa susah tagal tar dapa bali apapa lai

Acim: Beta baru tau mangapa Nona Pelu bilang akang pisang tuh par ose nih

Sander: Dia bilang tagal itu beta pung toh? Samua orang di negri nih tau ini sapa pung dusung, itu sapa pung batas.

Acim: Iyo, la itu antua Raja pung anana cucu tuh jadi tau te. Beta tar soal Nona Pelu tau ka tar tau batas dusung-dusung, mar beta taru soal di ose

Sander: Barang?

Acim: Barang tarus. Apapa sadiki barang

Sander: la kalu pisang su tua mo pi potong te, mau tinggal paniki, marsegu, kusu deng tikus nisi akang?

Acim: hahahaha……ose tau ka seng Sander? Batang sagu yang orang su balah bage dua, la pukul hari ini tar abis, tutu deng daong atap sa, mai-mai lai tar pi tetu akang, tagal mai-mai jua tau itu orang pung karja

Sander: la itu pisang jua beta pung, burung su tetu tuh

Acim: se tau mangapa burung tetu?

Sander: Barang?

Acim: tagal burung tau orang orang yang pung sa tar meku deng akang

Sander: bukang bagitu abang?

Acim: Sander, pisang yang Nona Pelu bilang tuh yang di pinggir mata bulu tomar toh?

Sander: iya

Acim: se tau mangapa burung tetu akang?

Sander: burung lapar toh

Acim: tagal rumpu deng anana kayo su tumbuh amper sama tinggi deng pisang. Se tau itu tagal apa?

Sander: tar pernah pameri

Acim: tau diri

Sander la’ang paskali par antua Acim pung cara kasi inga dia nih. Dalang hati dia bilang: “Iyo ale, beta nih lenggang ka bendar tar rekeng jam deng hari. Bembeng parang ka dusung sa sondor”.

Acim: sudah jua ale. Dengar itu ka seng??

Bedug su babunyi. Jam buka. Baru Sander sadar

Sander: (Topu testa la parang jatuh dari tangang) Tuangampong, su maghrib. Galap su nai

Acim: tagarego toh? Galap su mulai nai ale tuang. Cuci kaki, cuci tangang, la sono gepe poro sampe pagi jua ale

Sander batul-batul taparego. Ini kalu tar siap par lia dusung nih akang bagini sudah. Pas jalang-jalang tatutu, jang kata pisang, sagumantah jua mangkali tar ada.

Penulis: Elifas Maspaitella
Editor:Embong

Baca Juga

error: Content is protected !!