Sekilas Info

TALI HULALENG

SKOLAH HIDOP

Orangtatua deng basudara tuang hati jantong!

Brapa hari nih, jang kata kaluar rumah, buka jandela par lur birman sa sondor. Antua Acim su babingong sakapala paskali, taku jang sampe dia ada kanapa-kanapa bagitu.

Acim: Ola e…Ola yuuu…..

Ola nih Sander pung bini. Pas dengar Acim suara, la Ola kaluar dari dapor.

Ola: Abang e, bagumana tuh?

Acim: dong rumah nih pintu blakang sa yang tabuka, la pintu muka nih mamboro sa sondor e

Ola gepe mata la slak angka bahu sa par antua Acim. Pas lia kode tuh antua Acim su mangarti sudah

Acim: Sander e, awas jang kaget lai kuning la tar dua hari su karas

Sander: Jang masoso bodo-bodo

Acim: eh bae jua ale kata ada suara. Brarti napas ada e

Sander: Ao, masoso tarus, kira kata itu barang par maeng-maeng. Tar dengar kata samua tampa su merah tuh

Acim: hahahaha……itu bukang, supaya se jang kaki baminya talalu. Su dengar pengajarang par jang maniso di luar, dudu tado dalang rumah, mar tar mau turut. Bagitu dengar ada yang bae, lalu deng slak blaga-blaga bilang “itu ka seng, ada yang bae tuh, jadi tar apapa mo”. Ya tuheng, nanala deng bodo sakapala tuh

Sander: Tagal itu beta su tar mau kaluar lai nih

Acim: Iyo, bagus, mar bukang se stori deng beta la pintu jandela takonci Alexander e. Se kurang ajar su labe dari sipat torat lai ana e

Sander tatawa la buka pintu

Sander: Su buka nih

Acim: Mo mari ka sini la katong dua rol sadiki par akang keadaang nih dolo

Sander: ao, abang di situ, beta di sini sa jua mo

Acim: Beta su tau, se tar mau ka sini tagal tar bisa talang se kopi sabeker tuh toh?

Sander: la abang ada puasa tuh

Acim: Iyo la se kamari barang beta puasa batal? Oe beta nih iman baja, bukang sang ose yang gaba-gaba

Sander: Ao, turut orangtatua pung pengajarang tuh bae par hidop. Beta konci pintu tuh bukang takotang Corona, jadi su tau toh? Maitua jua mamasa tar sabarang waktu, mamasa pas deng Sahur. Tagal orantatua jua su ajar dar dolo bulang puasa bagini, siang tuh makang makanang dinging sa

Acim: Iyo, iyo. Beta pung birman ini dia hidop pung bagus jua e

Sander: Puji, angka kas nai ka bungang-bungang la banting ka dalang tonar

Acim: hahahaha…. Seng o. Beta mau pinjang se pung ingatang kahidopang tuh par akang keadaang oras nih

Sander: Ingatang mana?

Acim: ajarang orangtatua yang se masih pegang sampe oras nih bukang

Sander: iyo jua. Tata dolo bilang bagini: “Biar kata se skolah tinggi lai mar kalu tar pande jaga hidop, tar pake”

Acim: itu sudah. Konci rekeng se pata penah tengah jalang

Sander: kumbali lai

Acim: hahha….seng beta basangaja sa o. Akang bagini nyong, Corona nih bukang, katong samua maso skolah kahidopang ulang. Skolah kahidopang tuh akang di rumah, deng bini ana sa. Balajar dari hidop hari-hari di meja makang, pi kabong, deng jam-jam kebaktian. Lalu akang pung inti pengajarang tuh cuma dua sa. Nomor satu, hidop musti bae-bae, la kadua, musti bakusayang deng samua basudara

Sander: ao ada banya mo

Acim: yang banya tuh akang pung pasal-pasal

Sander: hafal susah kapa sampe orang tar mau skolah hidop lai

Acim: la kalu dari dua yang beta bilang tuh ose tar bisa hafal akang lai? Beta yang SR sa simpang dari hari ana sampe tu makang umur tinggi nih. Asal kata kamong makang gizi deng talang vitamin tar brenti, la simpang pengajarang bae sa tar bisa

Sander: tagal itu kasih akang konci sa. Katong skarang nih samua pake konci. Tau konci?

Acim: beta bilang se akang konci e. La coba se bilang kata sapa yang su biking akang deng sapa yang tar mangarti akang

Sander: konci apa?

Acim: Dua sa

Sander: Dua kumbali

Acim: Iyo tagal kalu tiga tuh suanggi

Sander: hahahhah…..pastiu deng suanggi. Sudah bilang konci dua biji ka dua buah ka dua balah tuh kamari

Acim: INGATANG deng DENGAR-DENGARANG

Sander tado tar suara

Acim: Sudah. Ingatang tuh se mau biking apapa, inga ajarang orang tatua. Yang bae biking, yang tar bae, jang nanala par unju bodoh deng makang puji. Dengar-dengarang tuh tabiat anana bae. Yang kapala batu tar dengar-dengarang tuh hidop par cari parkara. Oe muka karing e, beta bilang se e: kalu tar ada apapa, jang biking apapa, nanti su jadi apapa baru tar tau par biking apa. Sudah?

Sander: Iya abang

Acim: Sudah apa?

Sander: dengar toh

Acim: iyo, dengar deng se talingang tacu tuh

Sander: seng o, ini beta simpang

Acim bale blakang maso. Sander su rasa salah lai, ada puasa mar biking antua Acim su bicara deng suara basar. Ini tagal tar dengar-dengarang nih sudah.

Penulis: Elifas Maspaitella
Editor:Embong

Baca Juga

error: Content is protected !!