Sekilas Info

TALI HULALENG

Bulang Bae

Orangtatua deng basudara tuang hati jantong!

Sander ada dapa rajing babae satu paskali par dari kalmaring sampe pagi hari nih. Dia korvei sampe di antua Acim blakang dapor deng batu goso parang!

Acim: Manusia e, se rajing su talalu labe lai ale

Sander angka muka nganga sa mar tar suara

Acim: Iyo e, ada dudu tado di rumah nih kalu tar cari karingat jua bisa pamila e. Mar se pung tindakan bagus paskali. Beta suka

Sander seka karingat sa, mar tar manyao sadiki lai

Acim: eh mo kalu momou loko bawa buang os. Beta pi di baranda labe bae.

Sander: Talam sagu ada toh?

Acim: Beta umpang stengah sa se pung niat kaluar e. Se nih bukang, kalu jadi ikang, orang mangael matakael kosong se hap

Sander: beta su ciong akang bobou. La beta jua su nanaku akang pung bulang nih po

Acim: iyo, bulang makang sondor bayar

Sander: leker eten sonder betalen, itu dolo antua Yako Balanda dong bilang bagitu

Acim: kalu bagitu brenti se karja tuh jua, se pung caca su tanding akang di taloi sana tuh

Sander poti paskali par cuci tangang

Acim: he laki-laki badaki e, sapa ajar se deng daki sabadang tuh la dudu minong teh pagi deng beta. Pi sirang se badang sana. Ada Korona nih jang kata tangang, badang lai musti barsih

Sander tar mau malawang lai, dia dalang hati, malawang labe, talam sagu linyap. Jadi dia lari pi sirang badang. Tar brapa lama laki-laki su bale baru su basaleng neces paskali

Sander: eh ini apa kong pisah?

Acim: pisah apa?

Sander: Abang pung yang sana, beta pung ini, tar biasa taloi dua po, biasa satu sa to

Acim: dengar. Satu, kalu samua satu taloi, pas ada anam, deng se pung gargantang kasuari tuh se tipu-tapa beta terangkan dunya nih segenap, la kaget lai se su hap ampa, mo beta dapa du ate

Sander: ih barekeng bagitu deng sudara

Acim: Dengar dolo. Kadua bukang, taloi dua, mar se lia, se pung isi anam, beta pung tetap dua toh? Jadi ada dalapang bukang? Taru dia taloi supaya jang se kira beta kasih korona par se

Sander: Sio abang e, sampe pikir akang korona tuh paskali o

Acim: Itu tanda beta sayang se deng beta pung anana di rumah sana tuh, manusia tar akal e. Sudah jua beta tanya se, se mau taloi yang isi anam ka dua?

Sander: anam te

Acim: mo maka dudu jua tida; mar jang se rapat kadera ka mari, beta su resten akang ator stan sadepa labe tuh

Sander: tuang ampong, atorang banya par akang korona nih paskali

Acim: beta su brekeng tagal se kalu barsing ayang yang alus-alus jua lari tagal kira manei turung mau loko

Sander: Sudah jua. Beta su manyimpang barsih tuh tagal abang dong mau puasa toh

Acim: Iyo

Sander: Jadi bagini sa. Dalang bulang bae nih, abang tado di rumah sa. Kintal nih beta pung bageang par urus akang. Tempo-tempo jua nanti beta yang isi tampayang wudhu di sablah tuh. Jadi jang maniso talalu par biking diri rajing. Dudu tado situ sa, tau samua klaar deng sagala bae

Acim: se nih toh, beta lia se jadi manusia bae cuma pas Kajadiang deng Ramadhan

Sander: sudah jang ba’ungkel hal-hal itu par biking beta pamor ilang

Acim: hahahahaa…….se masih pikir pamor? Hahaha….se nih sumangang sa yang bagus

Sander: Sudah! Yang penting macang tadi beta bilang sa. Jadi abang tado sa la puasa. Yang laeng tuh beta yang urus. Su dudu di rumah sa nih beta su rajing pi lur kabong deng pi lao lai, jadi samua aman.

Acim: Iyo. Oda eee…. Oda yuuuuu

Oda: Apa lai?

Acim: talam sagu masih ada?

Oda: dalapang tuh tar gili-gili poro lai kapa?

Acim: iyo dalapang, du ator dua bageang mar saorang sa yang talang akang nih

Sander pura-pura skrek!

Sander: Hahahaa…….abang su musti latihan par puasa toh

Acim: Hahahaha…….se jawaban pas deng oras, kalu seng tuang tau se lai

Hahahaha…..dong tiga tatawa

Basudara Salam pung Salamat maso bulang puasa lai.

Penulis: Elifas Maspaitella
Editor:Embong

Baca Juga

error: Content is protected !!