Sekilas Info

TALI HULALENG

KAKI BAMINYA

Orangtatua deng basudara tuang hati jantong!

Sander su lia ausu paskali. Mar antua Acim tar kasih nat sadiki lai par baterek laki-laki

Pas lia dia ka degu-degu cuci piring deng Acim bataria dari dalang dapor ka sablah:

Acim: Ola eeee.... Ola huuuu

Ola: ya abang? Bag'mana tuh??

Acim: kalu ada jalanta, taru satetes di tampurung par beta jua ka?

Ola skrek babae lai. Ini apa kong minta jalanta? Ola bilang par Sander.

Sander: abang e, jalanta par apa?

Acim: ada ka seng?

Sander: iyo mar par apa?

Acim: mar ada ka seng?

Sander: iyo mar par apa la?

Acim: mo ada ka seng?

Sander: ada ni, mar mi skang minta par apa?

Acim: mar ada toh?

Sander: iyo ada nih. Beta su bilang ulang-ulang sampe urat su timbol batang leher nih e, tua e. Ada nih. Ada jalanta satu blek susu cap nona ka apa barang bardosa nih. Tuli ka?

Acim: kalu ada la bilang sa ada, pake tanya par apa talalu lai. Kalu tar mau kasih jua bilang sa, jang balas tanya deng tanya.

Sander: yah tuheng. Eh tua tar akal e, su brapa hari tinggal bakurung nih tuh jang umpang-umpang par hal

Acim: hahaha....se urat nai, darah nai, skang se nai capat

Sander: nai apa ka nai ka mana?

Acim: nai bar muhabet

Sander: hahaaha...jang basangaja bodo-bodo par masoso. Jalanta ada nih. Minta par apa??

Acim: ada toh

Sander marah la pi loko akang blek susu di pinggir tungku

Sander: eh tua e, ini amper sa' blek nih. Loko ambel ka sana la kalu mau minong yo minong, mandi yo mandi.

Ola marah Sander. La Ola tanya babae dari antua Acim.

Ola: abang e, mau goreng apa? Bulang dua kalmaring tuh beta ada masa minya banya nih, beta pung masih ada sisa tiga botol. Nanti beta bawa ka situ jua. Apa kong jalanta lai abang e. Tunggu e

Ola pas bale badang mau pi ambel minya kalapa, Acim tagor.

Acim: ana parampuang e, jang lai. Beta minta jalanta sa

Sander: eh mi par apa?

Acim: bukang se urusan

Sander: tuheng, Ola, se stop pi ambel minya kalapa sabotol tuh tagal tua nih cuma mau jalanta anyer nih

Acim: iyo Ola e, jalanta sa jua

Sander: ini ambel, la jang bilang beta hidop culas e. Beta su iko apa yang abang mau nih e.

Sander pas mau antar akang, Acim tagor

Acim: eh, stop situ sa. Jang depa batu itu. Stop

Sander: la jalanta nih??

Acim: se goso se kaki tuh dua-dua

Sander: barang?

Acim: Corona biking se kaki baminya tuh akang su karing, lia sasila

Hahahaha.....

Dong tau kaki baminya toh?
Baronda!
Tagal itu, kalu seng biasa dudu stan di rumah, par ada corona nih, dudu situ, jang kaki baminya.

Hahhaha

Baca Juga

error: Content is protected !!