TALOR SU BRAPA?

Orangtatua deng basudara tuang hati jantong!

Corona nih su biking Acim deng Sander macang ba'gali satu deng laeng kapa nih kong dong dua su tar mau dudu sama-sama lai.

Mar par pagi nih, Sander su tar manahang paskali par pi di Acim pung baranda. Tampa biasa!

Sander: abang e, asalamualaikum!

Acim: wa'alaikum salam. Maso tuang hati. Amper saminggu ka'apa e tar kas panas kadera tuh ale

Sander: itu macang. Corona ka Kolera nih biking katong parsis anana jujaro mungare yang pas baru tau batunangang la baku marah deng tingkai sa nih

Acim: eh, mar jang poti maso tuang. Tar lia pancorang alus sana tuh? Kas barsih se tangang do, baru maso. Poti ale, ada sabong B29 tuh, gurinda se jare-jare yang sang lengkuas tuh kas niew

Sander iko sa. Tar balas sa'kata lai. Abis kas barsih tangang la Sander maso taru panta di kadera yang biasa dia dudu

Sander: mar tadi malang beta dengar macang abang deng caca ada bakumalawang talor ka'apa tuh

Acim: talor apa?

Sander: ao yang kata ana bar' jadi, pas jadi la dia bilang musti makang talor di muka tengah malam tagal itu par kas mampos akang corona nih

Acim: iyo la beta deng maitua bakumalawang talor apa? Se tau toh, beta nih tar biasa sono tengah malang. Yang penting ayang su nai pohong, la katong su maso dar' dapor, beta nai tampa te. Tar sama se yang dudu tanding panta la rekeng bintang trus rai kata eso nih panas ka ujang

Sander: ao beta ada dengar abang story macang bataria-bataria la bilang talor mo

Acim: Sander, se mimpi ka katagorang?

Sander: ao beta dengar mo

Acim: se salah dengar ka'apa? Jang sampe antua Dace pung suara la se sangka beta

Sander: ao, beta dengar suara kaluar dari abang pung rumah sini. Abang pung suara ba'kalam, kalu Dace suara gareng

Acim: barang se dengar apa?

Sander: abang bilang talor, jadi pasti itu iko yang dong kas tau ana baru jadi di mana tuh bilang kata musti makang talor par tengah malang par kas mati corona

Acim: o, itu! Beta inga

Sander: napa tuh ka seng. Jadi abang pung brapa? Makang brapa?

Acim: iyo tadi malang beta ada bilang talor

Sander: beta talingang nih bagus abang jadi tar salah

Acim: la se prop brapa biji tadi malang (Acim suara mulai nai baru nganga Sander deng mata manyala)

Sander: he, mi apa kong suara su nai nih?

Acim: se prop brapa biji?

Sander: dua te

Acim: se pi bli di mana?

Sander: beta bilang Nani la dia lari pi bli di Na pung pondok, pas ada sisa lima, jadi beta makang dua, Ola lai dua la Nani satu. Abis!

Acim: Alexander! Tengah malang se bisa suruh ana kaluar rumah cuma par tagal talor?

Sander: mo skang abang makang tado-tado tar bar bage mo. Culas bagitu kata bagus. Asal yo sasadiki manyao kata ba birman tuh musti bar'bage, pas dapa tau obat corona, talang sandiri

Acim: eh karnikus itang badaki e

Sander: abang, karnikus tuh yang bawa akang corona, jang tuduh beta

Acim: iyo, se tuh karnikus yang bawa corona ka colera ka apa tuh. Macang se nih bukang, jang kata isolasi dalang kamar kaca, musti isolasi di utang biru-biru sana saja, la tar dudu maniso deng se pung hape ka apa barang bardosa yang sabang hari se nganga akang la stori deng beta mar mata tar nganga beta lai tuh

Sander: ih mar batul, samua orang jua ada bakutaru rabus talor tadi malang mo

Acim: kamong samua pung pande tuh. Oe, dolo Yohanis jadi se ada tunggu di luar?

Sander: abang toh? Beta ada pi di Jakarta par lobi deng bos-bos tuh

Acim: tagal itu ose tuh nau-nau. Ana baru jadi tuh dong manangis tarewas, tar ada yang bicara macang orang su basar. Se tau kalu Yohanis jadi langsung bicara dia bilang apa?

Sander: Papa, ini papa pung talor nih? Hahahaha....

Acim: bukang

Sander: mo?

Acim: dia bilang, mama, loko bawa buang papa tuh

Sander: hahahahahah

Acim: tatawa se pung bodoh tuh. Lia se pung hape tuh, la abis parcaya ana baru jadi bilang makang talor, sabantar lai tusa baru jadi bilang minong aer masing jam ampa amper siang

Sander: mar tadi malam abang ada bilang talor talor lai mo

Acim: iyo beta su inga lai kata ada bilang talor

Sander: la itu bale marah beta par apa? Sama saja mo su turut hox

Acim: pastiu deng se pung hox ka hokar ka hekar ka apa bodoh tuh

Sander: ih mar tadi malang ada bilang talor mo, sampe bataria-bataria mi

Acim: iyo te

Sander: la su talang brapa biji?

Acim: ampa

Sander: masa ka mantah?

Acim: stengah masa, la ambor lada

Sander: adaharos yang lia barane pagi-pagi nih ka. Hahaha

Acim: nene moyang ose. Tadi malang tuh Zaiful pung wate di Jawa telpon la beta tanya dia talor su brapa, mar tagal siknal blumpa-blumpa, dia tar dengar babae la beta tarewas tuh bodoh e. Bukang macang os la iko os pung hox tuh.

Sander muka merah

Acim: os mau corona mati tempo?

Sander: iyo toh abang

Acim: mau tau akang uba?

Sander: kalu ada bage do abang, jang simpang par diri sandiri

Acim: kalu bagitu skarang se badiri. Pas su mau jam spuluh pagi nih. Badiri sudah

Sander badiri iko Acim prentah, la kaluar dar' baranda

Sander: uba mana abang?

Acim: pi pulang la dudu manggarang dalang rumah duapulsatu hari

Sander: lalu?

Acim: batalor banya-banya ka situ. Kalu su ada, itu akang uba par corona

Sander: lo itu sama deng pemerintah bilang di rumah saja tuh, la uba mana?

Acim: uba corona tuh dengar-dengarang la jang haga-haga deng barang alus. Pi sana, manggarang dalang rumah sana

Sander tatawa sa la bajalang maso rumah. Pas kaki mau langkah maso:

Acim: uiiii

Sander bale muka la manyao, "apa lai tua e?"

Acim: cuci tangang do

Sander tar mau malawang lai, jadi dia bale di Acim pancorang par cuci tangang