Sekilas Info

TALI HULANG

CORINA KAKI PANJANG

Orangtatua deng basudara tuang hati jantong!

Sander nih su tar mau par kaluar rumah lai. Pagi-pagi dia buka jandela la bataria antua Acim di sablah.

Sander: Abang eeee....matahari su mau nai nih, kaluar bajumur supaya penyaki lari

Acim: (dari baranda rumah) beta bae, kalu matahari nai, sadepa sa sampe, mar ose, bakurung dalang kamar parsis porcici

Sander: katong su musti jaga diri supaya tar bajangke

Acim: se kira beta ada woter poken o? Se tuh yang mangkali dapa sarampah tinggalang. Mari dudu sini jua, jang tarewas dari jandela, skang orang kira katong dua ada katagorang setang kaki aer

Sander: skarang katong su musti ambel stand jang talalu rapat apalai baku pegang tangang

Acim: hahahah...iyo ambel stand te, mar jang putus hidop basudara toh

Sander: beta taku bajangke ale

Acim: yakis par se

Sander: beta tar makang yakis. Kalu marsegu beta hap. Hahaha

Acim: ao kaluar la kamari jua

Sander: ah seng ah. Beta taku bajangke

Acim: Sander e, beta nih kalu su kanal Corona ka Corina tuh jua beta tar huele se lai. Beta tar cuma prop mulu mar beta labe bae ika tangang dua-dua nih biar se panggel beta manyao deng isarat sa, la kalu mau momou loko momou sa

Sander: hahaha....beta sangaja sa abang o. Sabar, beta ka situ

Tar brapa lama Sander kaluar la pi di Acim Teras. Sama biasa, Sander mau ciong Acim tangang

Sander: kas tangang ba urat tuh ka mari la beta mau ciong ka salim ka apa tuh o

Acim: jang lai nyong. Beta tau se hati deng se pegang ajarang orang tatua, mar daripada se bilang beta kasih bajangke Corina par se, loko tundu kapala somba sa jua

Sander: somba barang mau maso minta? Hahaha.... kalu abang mangarti macang bagitu kan bagus, tagal beta taku jang ada yang kira katong sombong ka tar suka sudara kalu tar bakupegang tangang ka ciong tangang lai

Acim: seng nyong e, katong basudara sampe tanah tutu mata, tagal itu musti jaga sudara lai toh. Orangtatua dar dolo jua ajar, kalu rasa mau konto, pi jao dolo baru konto, apalai par keadaang oras nih, kalu su rasa badang tar sadap, panas tinggi, babatu baringos tar brenti, loko tinggal dalang rumah sa. Itu ajarang tua dar dolo-dolo

Sander: ajarang itu jua akang pas par keadaang oras yang ada Corona nih abang

Acim: iyo, beta jua su baca di koran deng lia di tivi lai. Kalu beta iko, akang konci cuma rajing cuci tangang deng cuci muka te. La dar dolo orangtatua su ajar, mau makang deng abis makang cuci tangang, la rajing cuci muka tuh

Sander: batul, mar kalu poro su kroncong, kong antua Mina panggel par makang deng beta skot lai tar pake cuci tangang

Acim: se pung tabiat itu yang biking sadiki-sadiki se nai tampa la ta lo'ung dalang kaeng

Sander: ao itu dolo waktu har' ana

Acim: iyo te. Apapa yang dar' har' ana su salah, tabawa sampe rambu putih te Sander.

Sander: sapa bilang. Pas tarangka badang tuh katong su deng atorang

Acim: hahaha.... se nih tar kanal diri sandiri

Sander: mau bilang beta lupa diri?

Acim: se su bilang tuh. Macang se yang tar kalesang nih bukang, jang kata Corona, Corina kaki panjang tukang pardidu tuh game sa se iko

Sander: hahaha.... jang bagitu ah. Corina tuh beta pung kaka tuh

Acim: hahaha....iyo ka. Mar beta maksud tuh Corina yang tua....

Sander: sudah jua, parkara putar haluan bicara bagitu tar ada lawan

Acim: hahaha.... Mar Sander e, kalu beta timbang-timbang, Corona nih bukang kas inga katong supaya jaga diri deng keluarga babae. Kalu seng mau bakupegang tangang, tar apapa, yang penting jang putus sudara, lalu hidop iko atorang sa

Sander: macang katong dua nih ka?

Acim: iyo, se seng usah ciong beta tangang jua seng apapa. Beta tau se hati

Sander: itu macang

Acim: iyo. Jadi bagumana kalu se pi pulang jua

Sander: apa??? Tadi tarewas beta datang, skarang skrobi beta pulang

Acim: iyo, vor beta loko bae se pulang dolo ka'apa

Sander: oh kira beta bawa penyaki par abang kapa?

Acim: bukang nyong

Sander: lalu apa?

Acim: tunggu e, beta ambel stand sadiki dari se dolo

Acim langsung kas pindah kadera dari Sander

Acim: se tadi kaluar kamar tar cuci muka

Sander: hahaha....abis skang abang tinggal paksa beta datang ka sini

Acim: itu batul, mar se musti cuci muka dolo la sikat gigi, kalesang diri tuh dolo baru batamu

Sander: oh tagal itu jadi abang hela tangang dari beta pas beta mau ciong tangang sama biasa tadi toh?

Acim: se su tau tuh...

Hahahah....dong dua tatawa la Sander pulang par mandi. Sander dalang hati, laki-laki satu tuh, umur sa yang tua mar mata masih tarang par lia sagala hal.

Baca Juga

error: Content is protected !!