Sekilas Info

TALI HULALENG

KARJA ASAL JADI

Orangtatua deng basudara tuang hati jantong!

Acim skrek par pagi-pagi nih, tagal Sander ada kasih kaluar kelder dua buah skali.

Acim: uiii... sampe tadi malang o? Tar stom e

Sander: beta mau kas suara mar su lat ale abang. Beta ada taru pisang sarambu di langkang tuh, abis pintu ka dapor su tutu, beta tar buka lai, skang dong kira beta tusa kumbali.

Acim: se lia langsik paskali

Sander: omba sadiki tuh mar akang goyang bagus ale

Acim: mo di sana bagus o? Basudara dong di sana hidop bagumana?

Sander: di sana moi abang. Lautang tabuka lebar paskali di muka-muka negri, mar pante bapaser macang katong nih amper tar ada. Batu buku-buku mai dalang negri, macang orang ada angka taru bagitu. Mar negri-negri bagus paskali

Acim: iyo e, kong kalu dong mancari bagumana?

Sander: ao itu tar susah par dong. Mangael ka buang jaren sakali sa su batahang hidop satu dua minggu

Acim: mo makanang?

Sander: limpa. Tar kurang apapa

Acim: la anana skolah bagumana?

Sander: beta lia sabang hari anana pi skolah tuh jua. Kalu sapuluh orang langgar muka pintu tida, mo asal abang kuat manyao sa, tagal sapulu-sapulu kas slamat pagi

Acim: anana tuh dari alus-alus lai su ajar hormat orang

Sander: cuma macang tuang deng nyonya guru amper tar ada, barang beta lia dari dong maso sampe pulang, tandang-tandang bola sa, la sparo anana dudu ka seng maeng-maeng di kintal skolah sa

Acim: yah tuhang. La skang bagumana?

Sander: Tagal itu beta bilang ana Yohanis dalang tuh, musti rajing balajar, tamang-tamang di pulu-pulu sana tar ada guru la buku jua susah par dapa

Acim: iyo, mar itu tar ada yang tar'kira dong di sana?

Sander: tuang tau lai. Mar bae jua kata Pandita-pandita ada upaya par tulung-tulung anana balajar lai

Acim: dar dolo tuh nyong. Skolah tuh gareja su biking banya la su tulung banya orang lai. Katong samua nih dolo jua maso Skolah Kresten

Sander: iyo ka?

Acim: se baru tau ka pura-pura lupa?

Sander: hahahah... lupa abang!

Acim: lalu nyong, jalang oto ada o?

Sander: saruas jua sondor e

Acim: apa te? Pulu tuh akang basar o?

Sander: garos amper dapa Nusa Aponno nih kapa abang

Acim: la kalu tar ada jalang oto, orang-orang pi mangente basudara di negri-negri laeng, ka kalu ada makburet di negri laeng, dong mangente bag'mana?

Sander: mo pilih te

Acim: pilih apa?

Sander: mau hotu ka panggayo?

Acim: ao Sander, jang se kabualang beta. Hotu ka panggayo tuh laste ada cuma taong dalapangpuluh bagitu. Ini su langgar taong sambilangpuluh sampe su taong nol ulang kaduapuluh nih

Sander: dong ada aspal mangkali panjang dari sini sampe di kubur sambilang depa sa kapa, mar itu jua putus tagal jumbatang pende mangkali 10 meter sa akang su ta'ero di tengah, la lia parsis cabang kartafel

Acim: sapa karja asal jadi tuh?

Sander: tuang tau, kalu tar Abunawas mo Yako Bodoh te

Acim: la dong tar dapa tagor?

Sander: maka tau deng dong

Acim: itu musti tagor nyong, kalu seng dong pawaru kiri kanang tar ada hasil apapa babae satu par rayat lai

Sander: itu akang

Acim: se tamang tambong yang orang basar tuh, pi saleng akang carita nih par dong la dong lia akang, kalu seng sapa mau tulung rayat banya di sana

Sander: beta manyimpang kelder nih dolo, la beta mau ka bendar nih

Acim: akang mangapa? Ini antua Mina pung kelder kabaya deng kaeng sorga toh?

Sander: abang e, sampe beta mama pung isi kelder sa abang tau?

Acim: Sander, hidop babirman nih bagitu. Dolo antua Mina tuh kalesang barang bukang maeng. Tempo-tempo tida, kelder tuh antua kas kaluar la jumur, supaya jang mai-mai hetu kabaya-kabaya. La antua taru cengkeh karing di akang dasar, baru tindis deng kabaya deng kaeng sorga yang babunga merah tuh. Jadi lia kelder nih pung rupa, katong su tau isi

Sander: iyo ale. Hidop bae macang bagitu tuh su susah dapa par oras nih e

Acim: seng susah bagumana, sorang su seng pastiu deng kelder ka orang tatua pung barang-barang tua lai, tagal sorang dapa kas bodoh deng barang plastik

Sander: itu akang!

Acim: konci rekeng, tiap taong bali baru, la kas plastik lama-lama sorang pi prop di semung par biking rusak alam

Sander: iyo ale. Beta mau bale ka kelder jua

Acim: talat

Sander: barang?

Acim: dalang rumah su pono deng barang-barang tuh la mau soso kelder di mana lai?

Sander: itu kumbali

Acim: biking rumah baru

Sander: taha pisi

Acim: hahahaha.....muka pamalas macang se tuh, kepeng jua gali tinggal lama-lama dalang se sak

Sander: cari hal kumbali

Acim: hahaha....bajalang sapulduahari, pulang-pulang bukangnya pi lur dusung mar cari karja deng pekerjaan yang anana alus-alus jua bisa biking

Sander: sudah jua, beta jua ada tulung bini nih, spok apa nih

Acim: hahaha....ator jua nyong. Beta pi pameri do, duriang su taru buah kacil. Juni kona

Sander lia Acim bajalang kas tinggal dia. Pas mau bale lia kelder bagini, Sander dapa inga apapa satu

Sander: abang e. Abang!

Acim tastop la bale muka par Sander

Sander: dangke lai par sagu dua forna deng kopi kapal api tuh

Acim tatawa sa, la bale badang pi kabong!

Baca Juga

error: Content is protected !!