Sekilas Info

TALI HULALENG

STAND DI STRAAT MATA AMPA

Orangtatua deng basudara tuang hati jantong!

 Cengkeh su taru bunga, jadi Sibu deng paitua Acim baru pulang pameri dusung. Dong dua bajalang sampe straat mata ampa bagini, Sander ada rol ancor. Tau jua baru datang dari kota.

Sander: [bilang par anana muda yang dudu deng dia] dong lia, kalu peci su karing di bitis, itu tanda baru dari dusung.

Sibu: batul tuh nyadu, mar ada satu lai yang ale lupa

Sander: apa nyadu???

Acim: kalu kewel tar ujung tar pohong, tar laeng lai, cuma Alexander dalang muka itang sa

Sander: hehehe.....jang manyampor deng beta urusan abang

Acim: he Sander, beta nih tar suka tamaso deng orang pung kaluar

Sander: mo tagal itu pi cuci kaki di parigi sana. Kata pake kas tunju peci karing di bitis, biar orang tau rajing....itu su jadul abang, jaman dulu......

Acim: [bicara par anana muda] dong su lia toh, orang tatua bilang dolo-dolo bagini: ‘cengke kaluar tai tikus, toko-toko mulai babunga’

Sander: abang, anana nih su seng jaman deng pantun lai, bicara apapa tuh jang babunga

Acim: oh iyo. [bale muka par anana muda] Yang Aba bilang tadi tuh artinya, Sander nih su batanding pas tau dia pung cengke ada taru bunga. Mar lia, cengkeh babunga di dusung, dia stand deng jengki pi kota dudu di toko-toko deng rumah kopi

Sander: Ah, ini abang su seng batul lai nih

Acim: se minta beta bicara jang babunga, jadi beta bicara buah-buah saja par anana nih mangarti toh. Bagumana [anana muda samua tatawa barang dong tau Om Sander pung kewel]

[lalu dong tiga bajalang pulang ka rumah sama-sama. Di tengah jalang, Sander tarek Sibu ka pinggir]

Sander: nyadu, tadi mangente ka papa pung tatanamang yang di sablah graf duriang bongko ka seng?

Sibu: tanya kewang kamboti jua

Sander: ao...

Acim     : [tei Sander pung kapala deng ulu parang] ose tuh, kalu tanya isi Rumah Kopi, sampe akang pung paping blok di muka lai se tau jumlah deng brapa yang rusak

Sander: sudah jua abang, la ini beta deng beta konyadu sa mo

Sibu: iyo, pi tanya kewang kamboti saja

Sander: barang mangapa?

Sibu: tadi laki-laki su pasang matakao

Sander: barang

Acim: barangkali Sander mau jual dusung ka.....????

Sander: ao abang, jual la beta deng bini ana makang apa??

Acim: dar dolo dong su makang se pung kewel tuh. Se tar sadar, beta pung ipar Unca bembeng anana sabang hari pi dusung par batanang tuh? Ose?? Tar puas ukur negri, pi ukur kota lai.

[Sander biking muka busu paskali. Tar tau itu tanda manyasal ka mangaku dosa. Sibu deng Acim pi, la Acim bilang: ‘Nyong, ale lia, ekspresi busu itu kalu keker deng pandita Tinus pung tustel toh, eh, garis muka dapa lia kantara paskali’. Dong dua tatawa sampe maso rumah.

Baca Juga

error: Content is protected !!