Sekilas Info

TALI HULALENG

BAJALANG BABAE

Orangtatua deng basudara tuang hati jantong!

Sio, antua Acim nih memang orangtatua yang paleng bae. Su tar tau mau bilang apa lai par laki-laki pung bae nih. Sander ada mau balayar, jadi antua Acim datang antar bakal par makang di kapal

Acim: Nyong e, se pi nih par brapa lama tuang?

Sander ada paparipi ika karton jadi dia manyao sondor lia Acim muka lai

Sander: barang kanapa? Tar ada beta tar rame ka tar ada beta darah tar nai?

Acim: beta nih ada tanya bae-bae nih nyong

Sander: kalu pi oras nih, brarti tanggal sapulsatu ka sapuldua su bale kapa abang

Acim: jadi sapulsatu hari e

Sander: iyo toh, biar abang darah seng nai lai, la gula jua tar abis capat toh

Acim: gula deng aer tuh tar harga nyong e. Hidop orang sudara tuh yang labe

Sander: iyo mar jang kurang hati e. Beta musti sampe di labuang tempo tagal basoso par nai lai, baru musti cari tampa lai

Acim: iyo, beta seng tahang se lai nyong. Napa ambel ini sa jua, par tahang-tahang poro di kapal

Sander: talam sagu???

Acim: sadiki sa

Sander tar pake buka akang kang toar tuh lai, dia langsung kas maso dalang tas rangsel. Sanang yang patut paskali, tagal caca Oda pung talam sagu tuh pung sadap apa lai

Sander: abang, beta seng lama e.

Acim: iyo ale nyong. Bajalang babae e

Sander: apa?

Acim: bajalang babae

Sander: hahaha....ini oras su laeng deng dolo la musti bilang bajalang babae. Oras nih su tar hotu par ka bendar. Dudu deng panta sa sampe. Jadi ucap apapa tuh iko jaman sadiki

Acim: Bajalang babae tuh beta sumbayang se seng cilaka di jalang. Itu beta sayang se Sander e

Sander: la abang tau beta nih mau balayar bukang?

Acim: iyo to

Sander: tagal itu musti bilang, balayar babae, bukang bajalang babae. Coba bajalang di lautang ale, pas baru kas turung kaki deng tinggalang. Kalu bisa barnang bae, mar kalu sondor tau mo minong aer sang bangka te

Acim: iyo sudah. Pi ka sana babae. Ingatang, sampe orang gunung tanah tar boleh biking apapa yang langgar dong adat

Sander: biking diri parsis pandita

Acim: sudah jua. Pi sana. Skang sampe labuang lai kapal su angka tali la se barnang deng nanala baru rasa

Sander langsung nai di honda. Lia balaga paskali. Tau jua, mau balayar sa sakampong tau.

Sampe di labuang, Sander langsung nai kapal. Bae jua dapa tampa bagus paskali. Pas kapal angka jangkar la mulai balayar, Sander inga bakal yang antua Acim kasih. Sander sambar tas rangsel. Pas buka bagini dapa lia akang kaeng toar tuh, dia hati babunga paskali.

Sander: sio, antua Acim tuh bukang. Biar kata Salam lai, mar pung tulung sudara pung bagus apa lai.

Sander buka akang palang-palang

Sander: talam sagu kalu caca Oda yang biking sa, seng ada yang tanding akang rasa

Sander tarus buka akang toar tuh. Pas tabuka bagini, Sander seng tau mau marah ka mau tatawa rabe.
Antua Acim ada kas not spanggal di kartas kalender cina salembar tanggal 2 Mart.

Sander buka baca akang tulisan. Acim tulis bagini: "Nyong, bakal nih biar se inga baranda tampa katong dua bakumalawang sabang hari. Jadi sagu dua forna nih deng kopi satu plastik sa. Tagal se balayar, beta kasih Kapal Api sa. Hormat beta, Acim"

Sander bale tutu toar tuh la pi cari aer panas di Kapal.

Hahahahaha.....

Baca Juga

error: Content is protected !!