Sekilas Info

TALI HULALENG

AER MASA DINGING

Orangtatua deng basudara tuang hati jantong!

Acim baru sampe rumah. Laki-laki baru abis banting kayo bakar sa ika garos lai.

Acim: Oda e

Oda: huuuuu

Acim: aer masa dinging sabeker jua ale tuang

Oda: ya Allah e, abis. Beta ada baru mau bambang nih. Beta biking kopi sabeker jua e??

Acim tar manyao lai. Biasa, tingkai nai ulang. Laki-laki langsung loko beker la bajalang ka Sander dapor, trus sirang aer masa dinging sabeker. Pas taru cerek bagini, ada babunyi sadiki.

Sander: hussss.... Nani, lia do jang tusa nai meja. Papa balong makang nih, awas skang akang mot papa pung julung bakar tuh lai Yohanis e

Tar dengar Nani manyao, Sander langsung turung, lari ka dapor cuma saru sandal sablah sa.
Bagitu sampe, laki-laki lia antua Acim bayangan parsis ilang di jiko dinding gaba-gaba.

Sander: tuangisa, tusa itang basar dar' mana nih. Yohanis eeeee.....

Sander arika paskali baru su pegang sosi spotong par sandar pintu. Bagitu kluar pintu dapor, Sander slak mau lempar bagini:

Sander: ya hormat!

Acim bale muka sa la angka pohong bahu

Sander: tadi kalu tusa toh, deng sosi nih mot tulang blakang lai

Acim: hahaha.....

Sander: parsis kapal kayo. Maso labuang tar stom, kaluar lai tar stop

Acim: se tau konto? Kalu babuni, sondor bobou, mar kalu tar babuni, tarima akang honar jua

Sander: story badaki apa par amper jam makang nih

Acim: aos ale nyong. Jadi beta ka situ par aer masa dining sabeker nih. Kas bale suwet yang su maleleh dar dusung sampe rumah nih ale tuang. Mari dudu sini jua, tunggu balangang papeda siap la katong dayong satu dua bale do

Sander iko Acim la dong dua dudu di degu-degu di bawah pohong lemong kompormos

Acim: nyong e, hidop nih akang manis bukang

Sander: ini tadi su lia apa lai kong hati su garu-garu. Bilang sa jang maeng deng umpama, macang orang mangael sontong la pake lambayang par tipu-tapa sontong

Acim: ao, ini bukang umpama. Beta ada puji katong pung hidop manis nih. Se lia, aer masa dinging nih sa. Katong pung abis, bisa tita ka se dapor, la saleng dar se cerek deng tar pake skepeng lai. Jang kata itu, pontong api sa, Oda bisa pi ambel di Ola tungku kalu beta pi kabong bawa gares.

Sander: itu akang! Su hidop manis bagini nih baru tar herang kalu orang yang tar tau gunung tanah tinggal kong kampong api par bakar katong dusung e

Acim: tagal itu tadi beta bilang toh: "hidop nih akang manis bukang"

Dong dua dudu nganga kiri kanang tar suara. Mar antua Acim poro su mulai padis, tagal tadi pagi nai ka dusung cuma bawa bakal tone kasbi sabola deng teh manis di botol lemonade.

Tar lama Acim badiri palang-palang, la seka suwet, langsung maso dapor kas' tinggal Sander.

Kaget bagini:

Sander: ehe....ehe...ehe....ehe....

Sander lari tutu idong baru baludah ancor

Acim: kapal sondor stom o nyong???

Sander: pangkonto bobusu e. Mangkali makang gayang ka taliporo ikang kapa nih

Acim: aer masa dinging dari se cerek akang putar tone kasbi jua bagus ale nyong e

Hahaahahahah.......

Baca Juga

error: Content is protected !!