Sekilas Info

TALI HULALENG

BADATI

Orangtatua deng basudara tuang hati jantong!

Sander nih skang biking Acim torana dia sudah nih. Dong dua pi lia sagu par mau tabang, mar tar tau dia pawela apa talalu.

Acim: Sander e, se pawela sampe

Sander: pawela apa abang. Lo sabar sadiki ka

Acim: se maniso cari apa? Orang cari kanari sa tar macang se. Beta lia se angka bula bale atap sa ika tuh su amper sapuldalapang kali kapa nih

Sander: story iko suka ka situ. Kalu mau pi kamuka loko pi ka sana. Pastiu deng bamulu macang meme-meme garoci

Acim: la se cari apa kong brekeng se bula bale nih beta mata su kunang-kunang

Sander: beta cari spatu laaaaaaarrrsssss (Sander bilang deng jumawa bae-bae paskali)

Acim tatawa par tau akang dia maksud, mar labe lai tagal lia Sander pung pamila

Acim: Mata su gora labe dari ikang garopa merah mar pamila sa

Sander: jang cari hal. Brenti! Pi sandiri ka sana

Acim: oe muka mati e, se tar lia lars di atas rahang langsa sana tuh o?

Pas Sander bale muka ka rahang langsa, laki-laki langsung senyum tampias par Acim sa

Acim: se kira beta kawe-kawe la mau hayal deng se senyum bodoh tuh. Kaskadu karing nih. Poti sana. Sarong akang la katong bakira

Sander pi sarong capatu lars tuh la dong dua tita ka dalang dusung sagu.

Pas sampe di dalang dusung sagu, dong dua su kikis batang sagu yang jantong su kaluar, par kas tanda.

Sander: mau tabang par oras nih o?

Acim: jang nyong. Beta lia nih ada ampa ka lima lai nih. Bagini sa, katong bale la bilang Sarikat par ma'ano akang sa, biar untung par Sarikat mangkali simpang par bali keperluan apapa par baku tulung basudara di negri

Sander: ao, kalu Sarikat ma'ano akang, la katong dapa brapa?

Acim: se mulai deng barekeng untung, kalakuang dagang

Sander: e abang, dadu jua bandar yang musti untung

Acim: pastiu deng se. Kalu beta bilang Sarikat, tetap Sarikat

Sander: lo dong untung jua par biking apa?

Acim: se dengar, bulang-bulang muka nih keperluan su mulai banya. Beta tuh seng pikir Ramadhan pung parlu, mar anana skolah. Dong su mulai tes par nai klas, pindah skolah, mangkali ada yang mau ka universitas lai

Sander: la akang ada bakutarika apa deng ma'ano sagu?

Acim: tagal itu jang apapa sadiki ka bendar, tar guntur tar ujang, ka bendar. Konci rekeng hal jadi dalang negri nih se tar tau apapa

Sander: la dong di Sarikat tuh mau apa deng untung dari sagu?

Acim: sapa tau dong bisa badati par anana parlu di skolah

Sander: abang, kalu mau kas skolah ana tuh pohong bahu musti kuat, la musti mandi karingat, bukan dudu tanding par harap gampang

Acim: se tau kata dong Sarikat tuh dudu tanding sang se la biking diri macang umur baru calakate? He... dong tuh su tulung negri karja sagala rupa. Se pulang ukur jalang su tar inja peci di muka pintu, se tau sapa yang mesel se jalang maso??

Sander: Sarikat

Acim: bae jua kata se tau. Jadi beta mau minta dong ma'ano sagu-sagu nih saja. Mangkali bisa badati par tanggong anana skolah deng penghidopang kalu ada mau pi merantau par maso universitas

Sander: mo pi bilang ka sana

Acim: mo te. Barang se bisa pukul sagu? Angka parang potong gaba-gaba yang musti skali putus sa biking akang sampe tiga kali kong mau pegang nani

Sander: jadi ini bawa beta ka dalang sagu-sagu nih cuma par kas tanda batang sagu sa?

Acim: seng o

Sander bale sadar diri lai. Tagal tar bisa pegang nani par pukul sagu. Pas mau bajalang bale bagini, Acim topu laki-laki pung bahu la kasih sein par pikol daong atap saika yang patut.

Sander: Tuangisa abang e! Jadi hentar beta datang par pikol akang bawa ka rumah?

Acim: nyong kancing masih bagus toh. Jadi hala ale tuang. Ingatang, karingat yang jatuh par tulung orang tatua tuh akang biking tanah subur deng tatanamang tumbuh bagus. Jadi hala ale tuang

Sander cuma bisa nganga Acim sa. Dalang hati, "ihhh....hidop babirman nih bukang, katong tar bisa malawang orang tatua". Tar tunggu lama deng Sander hala atap saika tuh jua mo.

Baca Juga

error: Content is protected !!