Sekilas Info

TALI HULALENG

PANIRIT

Orangtatua deng basudara tuang hati jantong!

Ada ujang su amper dua hari nih. Baru akang sirang parsis hari su galap. Kalu hener di aer batang tuh tar apapa jua, mar hati saki pas su sono la bula bale badang bagini rasa dinging, sapa tau bolsak su balandong tagal atap bocor.

Pagi tadi Sander ka antua Acim par mau minta loleba.

Sander: abang e......abang yuuuuu

Tar ada saorang manyao

Sander: tuheng. Manusia batang-batang nih tar ada saorang dalang rumah nih ka

Pas Sander mau tarewas ulang, kaget ada babunyi di balak rumah. Angka muka ka atas bagini, Acim

Sander: ya tuheng, beta su kira kusu siha sa ekor lai tuh

Acim sondor meku. Acim tinggal lur ka sana, ka mari cari tampa bocor

Sander: o ini musti kuku sa boleh, biar jatuh la pilang blakang kapala deng baji rengsel sana tuh

Acim: tutu dalang prop tuh. Beta salah tita di balak la buf ka bawa

Sander: tagal itu, kalu su tua tuh jang maniso la'iye ka atas

Acim: ada bocor. Se tar lia bolsak ada bangka sana tuh. Mau jumur jua mar matahari ada kaluar tar bae-bae lai

Sander: asar di para-para sa

Acim: buta huruf, nanau sakapala ose tuh. Kalu rumah cuma bocor jang se undang par tabakar.

Se ada atap dua daong yang tar pake-pake lai ka seng? Bawa kamari beta mau panirit bageang kamar nih dolo

Sander: atap dua daong tar pake-pake? Mo pi cari di semung. Sapa ajar par simpang barang busu dalang rumah. Par jadi rumah niri ka soro?

Acim: ao, se nanala tarus. Pi ambel sana dolo. Poti o!

Sander: ini tar minta babae pi maeng parentah

Acim: ha itu biar se tau adat

Sander: adat tuh kasih suara, minta, bukang parentah

Acim: buta hati. Adat tuh se pung apapa tuh akang bukang par simpang la busu mar par tulung sudara

Sander: akal jalang capat lai , la putar kata lai bagus. Tua nih tua sa. Yang kakaringang mangkali tar ada. Yang beta cucu par apa hari tuh masih malaisa

Acim: sudah se pi ambel ka sana. Mau karing ka malaisa ka loko kamari jang sabantar ujang kas balandong beta ulang

Sander arika paskali. Tar lama dia bale deng atap sambilang lirang su karing bagus paskali

Sander: mana akang pangkuku tuh??

Acim takajou tarbae paskali

Acim: nene moyang e, par dua kali nih se biking skang beta rubuh ka bawah sana tuh.

Sander: loko rubuh ka sana. Tagal itu kalu tulang su tar mampu par tita di balak, jang maniso. Kusu jua kalu su tua tar kaluar dari lobang kayo.

Acim: mar Sander e, ini se kasih deng hati bae ka marah?

Sander: badugal. Eh pastiu deng banilai tar maso akal tuh.
Ini, loko ka sana?

Acim: se nih bukang, cuma Tuhan sa yang tau se

Sander: te mi

Acim: itu brapa lirang Sander e?

Sander: loko capat o. Ampas gugur maso mata nih.

Acim: itu bukang ampas, paser dari beta kaki. Hahaha...

Acim loko atap la mulai panirit. Abis di bageang kamar, Acim pindah ka bageang laeng lai sampe di dapor. Sander tinggal pasapua kas nai atap deng loleba tarus.

Acim: sudah nyong manis. Orang tatua pasang, kalu rumah bocor, jang lari bale blakang kas tinggal akang, mar mari nai panirit biar bisa hidop sampe ana cucu

Sander: tagal panirit la nai kamuka tar tau kata atap ada ka seng toh?

Acim: se salah. Beta tau atap tetap ada sa

Sander: iyo, di birman

Acim: mo te

Dong dua tatawa, lalu Acim mulai turung dari atas balak. Pas su di bawah,

Acim: ini sisa tiga lirang. Brarti tadi se bawa sambilang?

Sander: barang?

Acim: se takser pas

Sander: pas apa? Labe!

Acim: seng. Pas. Tiga lirang nih kan beta tinggal ika di bulu par pampele muka pintu biar ujang lempar tar maso di baranda toh

Sander: mahatae e

Acim: itu babirman pung sanang di sini toh nyong. Mar tadi se datang deng parlu apa?

Sander: eh iyo lai, tagal abang pung hal, beta lupa bet pung parlu tuh ka seng. Loleba labe-labe mari par beta jua, beta mau ika pintu dapor. Anging banting tadi malang la akang jatuh la su patah

Acim: ambel jua. Ambel samua sa

Sander: iyo la mana akang?

Acim: di atas tuh e, tadi beta minta, se kasih nai samua la beta sisi akang di atap atas tuh, biar akang tar jatuh. Jadi tulang masih kuat toh? La'iye jua ale nyong gogos

Sander tar bisa bilang apapa lai cuma bisa angka muka nganga loleba di atap la tundu nganga Acim yang su lunjur di degu-degu deng muka tar bardosa apapa satu ada.

Hahahah....

Acim dalang hati, se dapa se slak tuh!

Baca Juga

error: Content is protected !!