ANCOR KLEP

Orangtatua deng basudara tuang hati jantong!

Antua Acim baru pulang mangael par pagi hari nih. Seng banya, mar ada skuda dalapang, bubara tiga, gurara kuning mangkali sapuldua ekor, seng basar, seng kacil mar badang babuah lai. Pas Acim gantong di jaga lemong kompormos di jiko dapor, dengar lai Sander babatu dalang dia dapor lai.

Acim: Oda e, mari la biking ikang nih. Tusa kaki ampa nih akang idong sasa mar tusa kaki dua di sablah nih kalu ciong apapa tuh se mangarti toh?

Oda: bilang orang sasabarang bagitu kata bagus

Acim: yah ampong dosa, se pi bae par tusa itang kaki dua tuh par apa? Ana tuh meti tabuka lebar, dia nganga, ikang puar di lautan, dia hela orang parao kas turung la dia tanding di bibir pante sa. Duriang jatuh tema, dia baheu dalang negri. Manusia macang itu, satu negri su tau, dia tar karja deng tulang deng karingat mar deng mulu

Acim kata pas talapas dari mulu deng Sander sambung lai:

Sander: Caca e, jang banya, bubara satu jua par papeda sabale jua e

Acim cuma goyang kapala la lia Oda mulai biking ikang.

Acim: bini kalu bae par birman nih bagus lai. Mar kalu birman yang rajing boleh. Birman nih pamalas biji ruku paskali. Alexander eee

Sander: iya abang, beta bawa bokor bagus ka loyang e?

Acim: jang, bawa garuru paser sa, kalu bagus lai loyang irian yang antua Mina biasa goso sagu tuh

Dong tiga basudara tatawa di blakang dapor. Tar lama Sander datang la dudu deng Acim di blakang dapor

Acim: Sander e, itu negara ka ini nih su bagumana lai tuh

Sander: Abang maksud nih Sadrak Negara?

Acim: Sadrak Negara sapa?

Sander: la Sadrak antua Yaya tuh dong panggel negara bukang?

Acim: hahahaha.... iyo ka. Di negri nih negara tambong paskali e. Adariang tuh dong panggel Camat, Yusuf par Sekjen

Sander: Iyo, mar ada yang pangkat tinggi lai

Acim: sapa?

Sander: Falip paitua Dace tuh par Jendral

Hahahahaha...dong dua tatawa, la dengar Oda manyao:

Oda: Yakonias Kopral

Dong tiga hati gili-gili paskali sampe tatawa parsir

Acim: he brenti. Jang par masoso. Mar batul ale, negara banya dalang negri mar sondor bisa biking apapa bae satu paskali

Sander: ini pulang mangael la ada dapa labrak dari negara ka bagumana?

Acim: seng o, beta cuma kasiang basudara yang dapa loko tagal pi rengsel kayo di utang tuh

Sander: abang, oras nih toh samua su pake atorang. Langgar atorang mo dapa loko te

Acim: iyo, atorang biar atorang, mar kalu mau lurus mo lurus, jang loko takaruang

Sander: seng bisa abang, pokonya sapa salah dia bangka te

Acim: seng bisa Sander, se tau Kewang Antua Yako deng Dullah toh? Beta angka jare mai nih par dong dua itu

Sander: barang??

Acim: dong dua bukang cuma tau sipat dati deng tanah negri ka sipat yang mata rumah pung. Mar dong dua jaga jang katong karja warmus dalang orang dusung deng tatanamang. Se mau kayo kaso rumah ka balak dalapang kali dalapang, se pi tanya dong dua la dong dua hentar se par orang pung dusung dolo baru se bisa maso par batabang. Bukang se pi warmus iko suka macang se yang tanang akang

Sander: o jadi dong yang dapa loko nih pi batabang tar kas tau dong dua kewang tuh? Nanala ale

Acim: bukang

Sander: kong??

Acim tundu muka. Hati balisah pikir dong yang su dapa loko

Sander: abang e, beta lia abang nih parsis sagu molat. Batang basar, jaga-jaga panjang, duri tajang, mar hati lombo lai e

Acim: bukang nyong. Dong tuh pi batabang jua mangkali par bini dapor ada asap sadiki, mar se lia perusah basar-basar yang bula bale deng oto trek tuh, dong dapor tuh tar asap tagal dong makang di rumah makang. Jadi kalu mau tindak tuh musti sama rata

Sander: dong su dapa ijin toh abang

Acim: Sander, ijin tuh sapa kasih?

Sander: negara te mi

Acim: lenggua deng gupasa tuh hidop makang taong, sapa tanang akang?

Sander: kalu di ewang, tumbuh sandiri kapa abang?

Acim: tumbuh di sapa tanah?

Sander: tanya dong dua kewang boleh ka'apa, barang dong dua labe tau tuh. Tadi abang bilang tuh

Acim: bae, jang pi tanya lai. Beta jawab sa, orang negri sini yang pung tanah. La se dengar e, dari nene moyang dolo-dolo, katong tar biking pasal-pasal sa katong tar warmus orang tatanamang ka karja langgar sipat tanah. Se tanding se pung atorang deng ijin par beta nih tida, se tau, tagal akang atorang deng ijin, la se bilang kata ini Negara pung, yang sana Sekjen pung, yang di atas Camat pung, la konci rekeng beta pung tatanamang di a'ong lai se pung. Macang bagitu?

Sander: hii...ini su kanal katagorang kaki aer tadi pas kas nai parao kapa? Apa kong beta yang dapa marah nih

Acim: Oda. Oda e

Oda: apa lai, tar lia beta ada biking ale karja nih ka

Acim: iyo beta tau, mar beta kasih inga se e, kapala lai mar jang se kasih par se birman nih e. Tar karja apapa la tinggal karja deng mulu lalu not iko suka kata pung ini, pung itu, pung sagala-gala

Acim langsung bale blakang maso rumah kas tinggal Sander deng Oda, kong dong dua baku nganga herang-herang

Oda: tadi antua isap tabaku ka mama capa sa?

Sander: seng o, mulu kosong-kosong sa

Oda: Ancor klep

Oda langsung badiri kas tinggal ikang

Oda: beta lupa biking paitua kopi tadi

Sander: yah tuheng, caca adaharos jua, lo ini beker kosong nih di sini dari tadi beta kira su abis minong

Oda: lo se lia akang ada niu mangkilat tuh

Sander deng Oda tatawa tagal Acim tingkah la Oda maso putar kopi sabeker par Acim.

Hahahah....