Sekilas Info

TALIHULALENG

KACA DIRI

Orangtatua deng basudara tuang hati jantong!

Sander nih bukang, kalu tar baterek antua Acim mangkali dia mati. Tempo-tempo macang dia su seng brekeng dawar lai, padahal antua Acim tuh sadawar deng antua Nani, dia pung Tata. Ini dia mau pi tanila la bakudapa antua Acim ada kas' barsih kuming patatas.

Sander: kuleeeiiiii

Acim su tau Sander yang huele dari dia pung tong jadi laki-laki sondor balas.

Deng napas di ujung idong, Sander huele ulang: kuleeeeiiiiiiii

Antua Acim tado sa, la badiri seka karingat deng pohong bahu. Pas dekat:

Sander: talingang taprop ka toher?

Acim tatawa

Acim: dawar macang se kalu tita jalang spanggal nih sa napas su di ujung idong, beta rekeng se nih tar lama lai

Sander langsung dudu di Acim pung walang langsung sambar cerek deng sungsang aer dari mulu cerek lai.

Acim: tabiat tar manir tuh iko sapa tuang? Antua Nani tuh kalu mau apapa bukang, kasih suara dua tiga kali dolo. Se nih kalakuang parsis bapa sarane ka'apa? Hahaha

Sander: Abang e, itu Eye su tar kalesang dia pung a'ong paskali. Rumpu taki deng daong-daong lesat tumbuh sampe di bibir jalang, mo tar brapa lama beta paha tarabe lesat tuh. Untung bae rutu-rutu di dia baner duriang ada lai, la beta mama par goso akang luka nih

Acim: se bilang Eye nih Eye Pistol o?

Sander: mo te. La skang Eye sapa lai

Acim: la ada Eye kasturi lai tuh? Tar kurang Eye di negri nih lai. Se macang orang sa la su tar kanal manusia tambong nih

Sander: ao, lo a'ong di bawah nih Pistol pung bukang?

Acim: bukang. Itu kasturi pung

Sander: ya tuhang, adaharos kalmaring dolo laeng beta gae jantong pisang di situ pulang beta buang suara par Eye Pistol, laki-laki nganga beta deng la'ang yang patut paskali

Acim: tagal itu se ba'usu di jalang salah. Coba kalu tadi pas di Duriang Bongko tuh se pata kanang, bagini tar tita batu-batu sinar tambong tuh toh

Sander: tuang ampong. Beta skang ilang dalang dusung-dusung nih

Acim: ilang dari muka bumi jua bae po

Sander: yah! Orang tatua macang bagini nih anana tar salamat. Tar sumbayang bae par anana ka sana mo

Acim: hahaha....se mau pi ka mana? Tar sa'orang di negri nih nai ka dusung deng matahari di atas kapala. Kalu ada itu cuma manusia bodoh. Itu cuma se sa

Sander: ao sudah jua. Beta cari karingat sa

Acim: bae jua. Cari karingat ka dusung baru deng jengki e

Sander baru dapa sadar kata dia pake calana jengki pi dusung!

Sander: sudah jua o. Jang cuma par tarkira orang pung salah sasadiki

Acim: iyo, la se lai tuh

Sander: beta tar pung tabiat tarkira orang

Acim: kong tadi apa?

Sander: tadi apa? Yang mana?

Acim: Eye Pistol tar pameri a'ong tuh?

Sander: oh iyo, laki-laki tuh kalu su dudu bor fluit bulu tui la su lupa dunya paske

Acim: parsis se toh? Bapa sarane tuh

Sander: jang kasih tagae salah-salah

Acim: hahaha...se nih sama deng antua Onggo pung pribahasa

Sander: apa?

Acim: ampas di orang kata se rekeng sampe jumlah

Sander: itu kan par dong pung bae toh

Acim: iyo. Mar se seng mau tau akang pung lanjut?

Sander: bagumana?

Acim: beta ulang sa biar sadap. Tabiat tarkira macang se nih bukang, ampas di orang biji mata se rekeng sampe jumlah, mar tar sadar kata di se biji mata ada tatal alam-alam

Sander nganga Acim deng mulu tabuka lebar paskali. Tar brapa lama antua Acim hekar sampe kuli poro padis. Hahahahahah

Acim: tagal itu, mau bilang apapa par sudara tuh, kaca diri dolo

Hahahah....Sander su lupa jalang nai ka dia dusung.

Baca Juga

error: Content is protected !!