Sekilas Info

Tali Hulaleng

JADI ORANG

Orangtatua deng basudara tuang hati jantong!

Sander deng Acim ada dudu lia Koran salembar pambungkus karsang kartou baru yang Caca Oda baru bali di Cakar Bongkar.

Sander: Abang e, lo pi baca salembar tuh par apa deng akang?

Acim: iyo, lo tadi beta su mau lego ka dalang graf tuh mar ada brita spotong nih ale tuang

Sander: brita apa?

Acim: eso lusa ada tes pe en es. Yang ada manusia tambong yang iko akang ka'apa e

Sander: tambong te, abis skang samua mau jadi orang tuh

Acim: iyo. Kalu dong su dapa sragam, baru basaleng neces tuh jang hega paskali

Sander: beta lai manyasal tar sadiki ale. Dolo kalu su skolah babae bagini su jadi soldadu nih

Acim: hahaha..... ose tuh bukang, kalu antua Yohanis masih hidop bukang, se bicara bagini deng lima jare kanal se dalang muka la talantang mata putih tabula bale

Sander: hahahahaha.....beta su tau e. Baru tau toh, jare sbuku memer smua la jare meme sampe jare kalingking amper sama basar samua tuh

Acim: se nih tar jadi manusia tuh bukang nasip mar itu buah kalakuang tar manir yang tar dengar-dengarang orang tatua

Sander: sudah jua, duriang mesung tuh jang tinggal tanding akang par ulang-ulang la konci rekeng beta su tar harga lai

Acim: iyo beta musti bilang supaya se sadar la Yohanis yang su pikol dia tete nama tuh se kasih skolah babae sampe dia jadi orang

Sander: la dia tuh orang tuh. Apa kong beta pung ana tuh bukang orang lai. La itu orang tuh ka bukang?

Acim: otak udang e, beta pung maksud, eso lusa dia dapa karja babae satu la bisa angka se pung dalang muka itang manggala tuh

Sander: ao tar usah paksa, kalu su susah, pameri dusung sa toh. Tanang cengkeh ka pala, labe-labe lai buka tanitar yang di mata bulu tomar di atas tuh la isi kaladi, kasbi deng ananas sa. Karja dusung jua bisa hidop mo, daripada pi jual akang, labe bae bale karja akang

Acim: se story bagini akang dengar sadap, umpama ada panas baru papeda dinging sapotong deng kuah tomi-tomi bakar maso langgar gargontong par biking poro tare la mata flao. Mar akang sadap di story sa, la karja kosong teteruga, nol basar. Mar kalu bukang bagitu memang bukang Alexander namanya

Sander: cari karja su susah, tar kepeng tar dapa karja babae satu lai. La biar kepeng sakarong lai oras ini bukang kalu tar ada orang dalang, pi cuma sampe muka pintu kantor sa, ujung bangko par manumpang panta jua sondor dapa

Acim: iyo se bicara tar salah, mar se musti kasih skolah ana tuh babae. Orang karja kabong skarang jua musti skolah

Sander: Tongisa, abang, la dar dolo kasbi tuh tanang akang mata ka atas tagal tabula bale kasbi pait. Itu pake skolah lai

Acim: se pung bagini-bagini yang makang bangko skolah tar abis la kong antua Yohanis tar brekeng se skepeng lai

Sander: bale ungkel duriang mesung kumbali

Acim: se lia koran spotong nih

Sander: bale koran kumbali

Acim: mari se lia

Sander: ao, dekat la dapa tei deng kalapa sisi tuh? Jare jua langkuas sama deng beta papa mo. Bilang jua akang koran tuh isi apa

Acim: Ini, ada ana muda nama Bili, orang Irian Jaya sana. Dia jadi antua Presiden pung orang kepercayaan. Ana nih dia jadi manusia bae paskali. Se kira dia tar blajar? Ini anana muda yang dong skolah tinggi, mar dong minta anana muda skarang nih par karja hal kacil-kacil sa, tar usah pikir musti jadi pe en es ka teken soldadu. Dong bisa jadi orang deng karja yang kacil-kacil sa

Sander: la tagal itu beta tadi bilang nanti Nani tuh urus dusung ka seng? La dia jua bisa jadi orang tagal dusung mo

Acim: iyo mar se tetap musti kasih skolah dia tinggi

Sander: la dusung dia pung, cengkeh polong tinggal punggul, pala batumbuh sandiri, duriang jua bagitu. Tar pake tes ka teken lai mo

Acim: ose nih tida, ayang toh kalu se goyang mayang kalapa, akang tau tar boleh nai meja. Mar se nih kasih mangarti ulang paleu lai susah

Sander: kan yang penting dia jadi orang toh

Acim: iyo mar musti skolah lai, buta hati e

Sander: hahahah.....hati saki lai

Acim: bukang hati saki, mar beta darah nai tagal se tuh nau-nau sakapala

Sander: itu yang biking abang umur panjang toh, ada tamang bakumalawang tida

Acim tar mau manyao Sander lai, mar dalang hati Acim mangaku, "itu akang". Kalu ana Alexander nih tar ada, Acim momou lai. Hahahahaha.

Baca Juga

error: Content is protected !!