Sekilas Info

Tali Hulaleng

BICARA DENG BAHASA SANDIRI

Orangtatua deng basudara tuang hati jantong!

Ada anging bae par oras nih, tagal Acim deng Sander akor paske. Dong dua ada dudu lia Zaiful deng Yohanis barmaeng hape.

Sander: Abang, su lia anana jaman skarang pung slak tuh?

Acim koro kaning

Sander: tar sama katong dolo-dolo la bulang tarang, dudu straat maeng skolah batu

Acim sondor manyao, mar kaning labe takoro baru nganga Zaiful deng Yohanis sampe kapala su miring ka kiri amper dapa bahu. Sander topu Acim bahu. Acim takajou:

Acim: karnikus nih, beta hati ilang tuh

Sander: nganga anana kacupeng alus barmaeng tuh jang sampe miring bagitu skang dong bilang katong nih ausu tar iko jaman

Acim: Sander, itu dong dua story apa yang letsgo, tern rait ka apa tuh? Itu nama gunung ka dusung? Jang sampe terem ball kapa?

Sander: hahaha..... itu bahasa enggres. Dolo abang dong deng balanda toh? Anana skarang nih su deng enggres

Acim: la dong dua barmaeng tar baku nganga mar story deng slak maeng prentah macang ada poti-poti par loko apapa bagitu e

Sander: anana oras skarang bukang, dudu baku sablah mar story tar nganga muka, tatawa jua deng akang hape tuh. Lia dong dua alus tuh

Acim: (panggel dong dua alus tuh) Ipul, Nani...

Zaiful deng Yohanis tar manyao

Sander: Abang, tar dengar tuh

Acim: Sander e, anana nih bukang, tunggu. Beta pi loko bangkawang sana dolo

Sander: tar usah. Anana nih kore sa boleh, kalu panggel tar dengar

Acim: dolo tuh katong dapa ajar, mau pi ka sapa kintal par barmaeng, taru talingang par dengar orangtatua panggel. Jadi katong pendengarang tajang. Tusa blumpa dari degu-degu sa katong tau, mar anana skarang nih dong taru talingang par apa?

Sander: mau dengar bagumana abang, lobang talingang taprop akang barang putih alus tuh e

Zaiful deng Yohanis maeng gem onlain pake hetset tutu lubang talingang

Acim: Nyong, anana nih tar toher la mangapa prop talingang deng kapas? Ka gigi ada balobang?

Acim skrek babae paskali tagal tar ada turunan toher dalang rumah. Acim pi kore Zaiful deng Yohanes. Dong dua kaget tar bae paskali

Ipull: Ao papa, itu ka seng beta kanal sut tuh. Nani se masih lif toh?

Nani: lif apa? Wate nih, beta su mau maso markas tuh, mar Wate biking beta kaget beta ambor tembakan sampe lupa relot amun tuh ka seng

Acim: he.....coba sorang dua taru barang bodoh tuh. Ipul, ini sorang pake bahasa dari sorga mana? Papa deng Wate Cande tar mangarti

Ipul: Papa e makanya gaul sadiki

Acim: (tutu Ipul mulu) se seng boleh bilang kata itu. Itu cuma par orang basar sa. Anana alus-alus balong mangarti akang. Ingatang, tar boleh bilang akang ulang

Ipul: (marontak kas lapas Acim tangang dari dia mulu) gaul tuh batamang ka sana mo. Papa tuh pikirang sasabarang

Acim: o....lalu letsgo, sut, lif, relot, amun tuh apa? Itu bahasa enggres? Dong dua biking diri macang ada bule satu babae di muka kamong dua biji mata bagitu

Nani: katong ada maeng gem onlain, itu bahasa di gem

Acim: Yah Allah e, Nani, kamong seng bisa pake malayu par barmaeng akang?

Nani: akang su pake enggres wate, mau pake malayu par apa

Acim: mangapa pake enggres?

Nani: mo skang orang di luar negri yang biking akang toh la dong pake dong bahasa jua mo

Acim: oh, iko dong bahasa la kamong tau akang pengertian?

Ipul: tau te. Biar spotong-spotong

Acim: Sorang pung salah di situ Ipul

Ipul: salah apa? Papa yang bali hape par beta toh

Acim: iyo, mar itu par jaga-jaga kalu mau kas' kabar par Uwa dong di Balanda, bukang par se barmaeng la deng bahasa yang papa bingong

Nani: la barang Wate mau bagumana?

Acim: Nani, se deng Ipul nih skolah toh?

Ipul: skolah te mi

Sander: la tagal skolah la dong bisa enggres tuh abang e

Acim: iyo beta mangarti

Sander: la abang maksud apa tanya bagitu?

Acim: Nani, loko bae se deng Ipul biking gem la pake malayu

Ipul: pake malayu skang orang bingung te wate

Acim: ha...sorang jua bingung deng enggres toh

Nani: iya, sadiki-sadiki

Acim: kalu bagitu biking orang enggres bingung lai, jang kas tinggal dong biking katong bingong sandiri

Nani: la kalu biking gem la pake bahasa malayu bagumana?

Acim: Wate tanya se Nani, relot tuh apa?

Nani: isi peluru

Acim: ha...pake akang

Ipul: la kalu tern left?

Acim: itu apa?

Ipul: belok ka kiri

Acim: resten

Nani: mo kalu sut?

Acim: itu apa?

Nani: tembak

Acim: skot. Kalu seng lot dia, jadi keker babae la skot

Ipul: la kalu bagitu sapa mau maeng akang gem tuh papa?

Acim: katong te

Nani: barang wate mau maeng?

Acim: asal se deng Ipul biking kang do

Ipul deng Nani baku nganga. Dong dua dapa kapala saki sudah nih. Orangtatua nih jua seng kalah dar anana jaman skarang. Hahahaha

Baca Juga

error: Content is protected !!