TETE MOMO

Orangtatua deng basudara tuang hati jantong!

Kalmaring amper malam, Sander su bembeng duriang satali ka antua Acim dapor. Abis taru akang la dia tambus ka baranda, tagal antua Acim ada dudu deng badang pa'isi.

Acim: Dangke lai nyong e. Ada duriang masa karing deng duriang labu toh? Dua itu yang beta suka dari antua Yako pung dusung

Sander: ada tuh mar seng talalu basar ale. Panas tikang kuat jadi buah seng basar talalu

Acim: yang penting bisa mangkola, biar orang tau makang duriang

Sander: orang tau tagal honar, tagal kalu seng honar itu berarti hati nai-nai par muntah. Hahahahaha

Acim: buta hati nih. Bicara muntah-muntah apa nih. Beta poro ada tare nih skang beta loha se!!!

Sander: hahahah....poro kamboti tuh!

Acim: Sander e, se kaki su bae tuh ka?

Sander: seng usah tanya par cari hal ulang.

Acim: hahaha....itu jua bae biar se jang pardidu, heu ka sana ka mari, ukur jalang pulang deng kaki tangang ampa

Sander: Mar abang ada dengar apapa lai ka seng?

Acim: Sander, sudah jua. Jang se mangael deng matakael kosong lai la konci rekeng beta pikirang sampe seng sono

Sander: ao ini bahaya

Acim: iyo, se pikir akang la se ator akang sandiri jua, jang biking cigulu par beta la beta musti pikir par biking otak pono

Sander: beta sungguh-sungguh nih abang e, ini kalu katong seng jaga, katong samua cilaka

Acim: par manusia yang hidop taku alam kubur macang se, loko ose cilaka sandiri, jang se jadi Tete Momo par orang laeng yang ada pikir hidop deng umur nai badang

Sander: yah tuheng. Ini su rame di amper samua dunya.

Acim: beta su tau. Se mau kas taku beta deng akang corona toh? Oe, tada talingang tuh babae, jang kata corona, kakarlokang yang kapala taguling lai kalu sorong bukang, beta sepak tampias sampe di Surabaya

Sander: Abang tau corona lai? Beta kira dudu jaga kintal nih la seng tau dunya nih lai padahal beta salah ale

Acim: abis corona, se mau kas taku beta deng orang-orang yang dong mau kiring ka Buru? Lalu se mau saleng brita orang bongkar rumah ibadah di sana sini lai toh?? Iyo toh???

Sander la'ang par dengar antua Acim tutur satu abis satu. Dia dalang hati, laki-laki tua nih mangkali stel radio transistor tarus ka'apa e?

Acim: Sander, beta bilang par se e, pi bilang par dong di bendar tuh e. Kalu mau tulung rayat nih, tulung babae, jang latihan laeng, barmaeng laeng. Lalu jang biking isu-isu par jadi Tete Momo e. Kalu mau ator bae, ator, jang kira rayat nih tar skolah.

Sander: abang e, beta su seng tau mau manyao apa lai.

Acim: itu la se sadar, jang suruh orang mandi padahal se ada piara daki di badang.

Sander: maeng deng umpama kumbali

Acim: se tau akang pengertian?

Sander: seng

Acim: akang pengertian, jang jadi Tete Momo la rabe se pung mata manyala tuh par kas taku anana alus-alus.

Sander: pengertian bagumana tuh?

Acim: suka-suka beta, biar se pikir toh

Hahahahaha..... Acim langsung pake baju kous leher bontal putih tagal anging manucu par mati-mati galap tuh.

Acim: dinging su manucu ale

Sander: tinggal deng badang pa'isi sa, umur masih bagus tuh

Acim: nene moyang nih

Hahaha....dong dua tatawa la lanjut carita sanapas