PALASI

Orangtatua deng basudara tuang hati jantong!

Ana Sander nih dia biking antua Acim tinggal deng pikirang su amper maso tiga hari nih. Caca Oda su babingong tagal taru kopi sabeker deng talam sagu, sampe akang kopi tuh dinging, lalar dudu di mulu beker lai, antua Acim seng sontoh akang par satiris lai.

Konci rekeng antua Acim bakira pagi-pagi potong pele skali jang Sander pi ka bendar. Untung bae kata antua Acim poti lai, itu kalu talat sadiki sa, mo Sander su talucu ka bendar.

Sander: lho apa kong abang su pele beta pintu nih?

Acim: nyong e, se biking beta balisah di tampa su amper spulu malang sepe-sepe nih. Se pung caca Oda sampe su kira jang sampe ada masoso tarbae.

Sander: barang beta biking apa?

Acim: ao, par kalmaring-kalmaring se ada bilang hati su tawar par sapa tuh. Se balong kas tau kata itu sapa

Sander: ao sudah jua abang, su tar penting lai. Samua su jadi. Biar Abang tau dia nama lai tar bisa biking apapa mo. Katong cuma orang kacil, jadi jang tamaso deng orang pung takaluar

Acim: se tau beta toh Sander, ada sapa biking se hati tar sanang, itu sama sa deng dia kore beta lai

Sander: la abang bisa apa kalu dia kore?

Acim: asal beta tau dia tuh sapa dolo

Sander: sudah jang mangael beta lai. Hahahaha….. geser sadiki la beta kaluar dolo. Su pele sampe katong stori di muka pintu macang orang tar tau adat sa. Pindah sadiki ka sana mar kalu mau maso loko maso ka mari. Badiri muka pintu macang ada mau maso minta bini

Acim: sudah jua, mari se kaluar jua, beta su palasi bicara apapa deng ose. Tar bisa tarus tarang par orangtatua. Se inga e, kalu se tahang deng tabiat ini, lalu ada orang biking se hati susah, pikol akang sandiri, jang datang deng muka layo la saleng par beta lai e

Sander: ih jang bagitu e. Beta cuma seng mau abang pikirang sa par barang bodoh-bodoh nih

Acim: mo kalu se seng mau beta pikirang, simpang akang dalang se kovor sa, jang se buka la tanding isi kovor par beta toh. Se biking beta tar sono spulu malang sepe-sepe se kira itu bae lai Alexander e. Beta umur su seng sama ose lai

Sander: Jang talalu bamarah

Acim: se su langgar sipat torat lai Alexander e. Untung bae yang macang se nih cuma satu sa di negri nih, mar coba kalu ada barang dua sa, katong binasa

Sander: Ao seng o. beta pi dolo e.

Acim nganga Sander pi sa, su seng mampu ucap apapa lai tagal herang Sander pung tingka. Pas Acim mau bale ka rumah, Sander bataria:

Sander: Abang e, mar beta hati tawar tuh batul

Acim: Pastiu deng os

Kaget bagini!

Sander: adoooohhhhhh……….. (Sander kaki tamaso dalang kolang alus satu ada, la kaki tabale) Abang e…… tuangampong e…..adoooooohhh eeeee

Acim: (pikir Sander pura-pura) jang kata lobang alus, liang basar rumah nih lai mar loko ose tamaso ka sana

Sander: Abang e….ini seng maeng-maeng nih, tulung dolo ka

Acim tar meku! Acim dalang hati, se su biking beta balisah di tampa, maka loko se balisah di situ lai ka sana. Sander tar jadi pi bendar tagal kaki bangka lia-lia baru akang jarning parsis kaca muka. Pas Acim tau kata itu batul:

Acim: itu bae. Kalu tar palasi loko frek ka sana