Sekilas Info

Tali Hulaleng

HATI TAWAR

Orangtatua deng basudara tuang hati jantong!

Antua Acim ada dudu baca koran, lia dari muka ka blakang ulang-ulang su brapa kali paskali. Sander rapat mar sondor suara sadiki lai la lempar panta di kursi rotang.

Sander: (skrek stengah mati) Ah karnikus alus lho..... eh untung beta tar skolah bamaki kalu seng tau e

Acim: (skrek bae-bae paskali) se mau maki sapa?

Mar antua Acim lia Sander tinggal pegang panta la ba'uru padis paskali. Tuang ampong, paku alus di kursi rotang tusu dia panta. Hahahahhahah

Acim: buang panta tuh lia babae, jang asal dudu sa. Itu kursi tua. Pilih tuh kadera kayo bagus sana tuh, la kalu mau lego ka buang ka lempar panta, tar binasa macang tadi

Sander sondor manyao Acim sa'kata lai.

Acim: Sander, se muka layo barang mangapa? Ada apa yang seng batul di hati? Kalu bini ada babengkeng, kaca diri sa, jang lempar salah par bini

Sander macang tar meku paskali deng Antua Acim hari ini

Acim: o beta tau. Se ada mulai timbang-timbang harga tagal ada mau pilkada di brapa tampa nih toh? Beta kas inga, jang pake dacing makassar, pake dacing cina sa, biar taru biji timbangan satu abis satu supaya pas

Sander tar suara apapa. Acim tambah babingong deng Sander wer hari ini

Acim: Nyong e, sio. Beta su deng lombos nih. Ada apa tuang?

Lama eeee baru Sander pica suara

Sander: Abang dar tadi cari barita apa?

Acim: beta lur sa mangkali ada barita babae apapa bagitu mar macang sama sa nih

Sander: beta hati su tawar ale abang

Acim: tagal apa ka par sapa?

Sander: ao, tuang tau lai. Tar sangka kata laki-laki bisa bagitu e. Hati tawar abang

Acim: nyong, laki-laki sapa? Laki-laki samua skarang nih su jadi laki-laki bae toh

Sander: bae apa? Sudah jua beta mau ka rumah jua. Jang kurang hati e abang kalu barang sa'minggu beta seng mangente nanti. Beta hati su tawar

Pas Sander mau badiri, Acim sorong kaki pele

Acim: he Alexander, se nih bukang, jang beta kasih satu skot par se la se talantang makang jubing e. Se tau hati tawar par beta? He beta nih su jadi se orangtatua, beta nih seng pernah buang muka dari kamong samua turunan e. Se haga-haga deng beta, tau hati tawar lai. He...brekeng dawar baru kas kaluar kata macang tadi e

Sander: ih, khotbah labe panjang dari Pandita Tinus e. Hahahah....

Acim: nene moyang se. Tau tatawa beta

Acim su amper manjura pilang Sander, mar Sander toro kadera sadiki

Sander: beta seng hati tawar par abang. Sumpah e. Guntur pica di langit, tanah muka negeri tabalah abang e. Beta pung orangtatua jua ajar katong musti taru hormat par Abang Acim

Acim hati lombo

Acim: la sapa biking se hati tawar

Sander: ada

Acim: iyo sapa, se bilang

Sander: yang penting abang tau sa, ada. Eso lusa baru beta bilang dia nama. Beta bale do e, balong mandi nih.

Acim cuma bisa nganga Sander bale ka rumah sa. Dalang hati, ini sapa su biking Sander hati tawar lai nih???

PENULIS; Elifas Maspaitela; Pengamat Sosial

Penulis:

Baca Juga

error: Content is protected !!